A hun tea rah ṭhin KDB!
Euro 2024-ah a vawi khat nan Belgium an chak ve ta a, lawmthu hrilh tur an nei a nih chuan captain Kevin de Bruyne chu lawmthu hrilh tur a ni ang - Manchester City midfielder hi a khel ṭha takzet a, a team chakpuitu a ni.
Inrinni zan khan Belgium hian 2-0 in Romania an hneh a, Youri Tielemans leh KDB ten goal khat ve ve an khung. Romania-in hun tawp thlengin a chhanletna tur an nei lo a, Belgium-in round of 16 luh beiseina thar an nei ve leh ta.
Belgium hian an match hmasa berah rin loh takin Slovakia chu 1-0 in an hneh lo a, champion beisei ngam team hi an zuai hman hle. Mahse, a hunah tak KDB-a'n captain mawhphurhna lain a thiam thil a 'show' a, Romania-in an chelh lo.
Zirtawpni zan khan group E inkhel dangah Ukraine chuan 2-1 in Slovakia an lo hneh tawh a, he group hi a ngaihnawm ta hle - match khat ṭheuh khelh tur la nei chungin point thum ṭheuh an hmu a, last 16 lut thei vek an ni a, la tla thei vek an ni bawk!
A hmuhnawm
Belgium-in chak an mamawh tih hriain, inkhel ṭantir aṭangin an nawr nghal a, goal hlawh chhuak turin an nghah rei pawh a ngai lo - minute hnihna lekah Romelu Lukaku chuan Tielemans tan a siamsak a, Aston Villa midfielder hian chiang zetin goal-ah a chantir.
Chak loha tla thei dinhmuna ding Belgium-in goal an khung hma avangin fans lam rilru a hlauthawng rei lo a, heti chung hian KDB leh a ṭhianten inthlahdah phah an tum lo - na takin Romania an nawr reng a, an vanneih zan ni se, goal tam zawk khung thei an ni.
KDB siamsak ṭha lutuk Sevilla forward Dodi Lukebakio-a'n goal-a a chantir theih lohte chu uiawm a tling a, khel ṭha leh hnawk em em Lukaku-a'n KDB-a 'world class' pass aṭangin goal khung mah se, offside vangin pawmsak a ni lo.
Minute 79-naah Belgium hian goal an khung leh ta nge nge a, a phu ang ngeia khungtu chu KDB a ni - Romania keeper Florin Nita-a'n vawi khat ṭha zeta a dansak hnuin, hun tawp hnaih lamah erawh KDB a dang reng thei lo a, a tawpah Belgium an chak.
Lukaku a vanduai
KDB thiamzia hmuhtirin kan awm a, fans tam takin hahipin an fak - chumi piahlama sawi lan loh theih loh chu Lukaku a ni a, Chelsea striker hi tun Euro-ah a vanduai takzet. Goal thum a khung tawh a, offside vangin pawm loh vek a ni!
Lukaku hian Romania lakah pawh a khung leh a, mahse, a goal khung hi offside vang bawkin pawmsak a ni lo. He goal luhna tura KDB ball pek chu a 'class' thlawt a, mahse, Lukaku-a'n a goal khung a lawm rei hman lo.
Video assistant referee (VAR) a inrawlh vat a, a goal khung hi pawm a ni lo. Euro 2024-ah hian offside en nan automated offside system hman a ni a, hei hian goal line technology ang deuhin, dik lo thei loin thutlukna a siam.
Romania laka Lukaku offside-na pawh hi milimetres vel chauh a ni a, VAR pangngaiah referee-in en let tawp se, mit lawngin a offside-na hi a hmu kher lo mai thei tih vel a ni. A tawpah chuan Lukaku a vanduai a, a goal khung pawmsak a nih hun a nghakhlel khawp ang!