Ukraine tan thawhlehna ni ropui!

Ram buai vanga ngaihven hlawh bik Ukraine pawhin Euro 2024-ah hnehna an chang - player langsar kawl nual chungin Ukraine hian an match hmasa berah Romania chu 3-0 ngawtin an ngam lo a, an mualpho.

An match hnihnaah erawh Ukraine an insiamrem a, Slovakia chu 2-1 in an hneh - round of 16 luh beiseina an nei thar ve leh a, inkhelh zawha player-te hnuk ulh khan Ukraine tana he inkhel result hlutzia a hrilhfiah.

Slovakia tan Belgium an barakhaih ṭuma goal khungtu Ivan Schranz chuan goal hmahruai a khung a, he goal hi an humhim chuan round of 16 an lut dawn tih a chiang - an phur hle.

Mahse, second half-ah Ukraine-in team huaisen zia pho chhuakin, na takin Slovakia an nawr let a, goal hnih khungin an chak daih. Ukraine hian minute 54-naah Dynamo Kyiv midfielder Mykola Shaparenko hmangin goal hmahruai an khung a, Arsenal defender Oleksandr Zinchenko siamsak a ni.

Ukraine boss Serhii Rebrov-a'n thutlukna dik a siam zui. Roman Yaremchuk chu minute 67-naah Artem Dovbyk la chhuakin a luhtir a, Valencia striker hian minute 80-naah chakna goal a khung zui - khelmualah minute 13 bak hun a hmang hman lo! Ukraine an chak a, last 16 luh beiseina a nung thar.

Slovakia laka an chak danah coach Rebrov a fak loh theih loh - a substitution siam fuh bakah, inkhel hmasaa khel ṭha tawk lo Real Madrid goalkeeper Andriy Lunin bench-a a dah ngam chu a tifuh hle.

Inkhel ṭantir lamah Ukraine hi an talbuai deuh a, hetihlaia chhanhimtu chu Lunin aia lut keeper Anatoliy Trubin a ni - Benfica keeper hian inkhel ṭantir lam minute 10 chhungin save ṭha zet vawi hnih a nei.

Trubin hian Lukas Haraslin-a khung ngei tur nia lang chu a kein a dansak a, Schranz-a goal khung tur a dansak bawk - David Hancko freekick pet a dan pawh kha thlirkir ila, Rebrov-a'n an match thumnaah Benfica keeper hi a ring nawn a nih pawhin a mak lo ang.

Chelsea forward Mykhailo Mudryk-a'n a tirah beisei phak lo mah se, a khel ṭha tulh tulh a, La Liga top scorer Dovbyk pawh a goal khung lai Ukraine fan-ten hmuh an châk tawh ang - match tawp berah Belgium nen an intawng dawn a, boruak a 'hot' loh ring suh.