Volleyball player hlui a thi

Mizoram volleyball inelna lian leh sang ber Pro Volleyball League (PVL) khel ṭhin J. Hmangaihthanga chu Inrinni khan Matupi hmunah hnam sipai (PDF) leh Burma sipai inkahnaah silai mu tawng fuh palhin a boral.

Mizoram Volleyball Assocaiton (MVA) thu chhuah tarlan danin, J. Hmangaihthanga hi Thutak Nunouitu Team, Hunthar, Chhinga Veng, Chanmari West leh Tuichangral Volleyball team-ah te lo khel tawhin, best setter chawimawina pawh tournament hrang hrangah a lo dawng nual tawh a ni.

MVA chuan, "J. Hma, hun lo tak maia chatuan ram min pansan hi Mizoram Volleyball Association chuan pawi a tiin kan ui tak zet che a ni. Lei chu leiah, vaivut chu vaivutah tiin ui takin kan thlah che a, i nupui fanaute Pathianin thlamuan se, vanin nuamah kan intawk leh dawn nia," tiin an thlah.