Pawl 14-in thisen unit 319 pe

June 22, Inrinni khan Mizoram hmun hrang hrangah blood donation camp buatsaih a ni a, pawl 14-in thisen unit 319 an pe.

Civil Hospital, Aizawl tan Mizoram PYD, Dinthar Bialin unit 33 an pe a, ṬKP, City Church Unit-in unit 28 pein, petute mipa 25 leh hmeichhia pathum an ni. Lairam Isua Krista Baptist Kohhranin unit 16, North Khawlek KṬP-in unit 14, ZPM Ṭhalaiin unit 9 leh Club Dominar-in unit 7 an pe a; mimala pe (individual voluntary donor) mi pali an awm bawk.

Synod Hospital tan KṬP, Nisapui Pastor Bialin unit 61 pein, petute mipa 56 leh hmeichhia panga an ni a; Mizoram PYD, Bawngkawn Bialin unit 22 pein, petute mipa 19 leh hmeichhia pathum an ni. ZMC tan KṬP, Hlimen Branch-in unit 51 an pe a, petute mipa 38 leh hmeichhia 13 an ni.

ṬKP, Lunglei Electric Veng Bialin Lunglei Civil Hospital tan unit 43 pein, petute mipa 33 leh hmeichhia 10 an ni a; KṬP, Serchhip Bazar Branch leh Field Veng Branch-te'n Serchhip District Hospital tan unit 20 an pe. Salvation Army Youth, Siaha Corps leh Mizoram Gospel Centenary Corps-te'n SAY Sunday Day pualin Siaha District Hospital tan unit 15 an pe a, petute mipa 11 leh hmeichhia pali an ni.