Thawh zai rel tawh rawh England!
"Football-in run a lawi dawn e..." tiin an zai mup mup a, football inti neitu takin an hawi vel a! Mahse, a tak ramah erawh England-in eng ruai an la ang lo a, tuna an khelh dan aṭang chuan champion sawi ri chi an ni lo.
Three Lions hian match hnih an khelh tawh aṭangin point li an hmu a, zanin dar 12:30-a Slovenia an hmachhawn hunah chak zo lo pawh ni se, Gareth Southgate leh a naute tan last 16 luh nan a tling tawk thoin a rinawm.
Mahse, ni e, mahse, tih a ngai tlat. England fan-ten player ṭha rual awm khawmna an team hi point hlawh chhuak hram hram turin an beisei lo a, ngaihngam taka knockout luhpui turin an beisei - zanin hi a chhanna pek hun chu a ni e!
Zanin dar 12:30-ah vek Denmark leh Serbia an inkhel dawn a, team pahnihin round of 16 luh beiseina an la neih ve ve avangin he inkhel pawh hi a hmuhnawm khawp ang.
Nangni pawh!
England-in an match hmasa berah Serbia chu 1-0 in an hneh hram a, an match hnihnaah Denmark chu 1-1 in an inhnehtawkpui zui - Three Lions result hi a chhe hrim hrim a ni lo a, an khelh dan a mumal loh avangin fans an lawm lo a ni zawk.
Southgate leh a naute sawiseltu langsar zingah England player hlui an awm nual a, hei hi captain Harry Kane chuan a ngaithiam lo. Bayern Munich striker chuan, "England-in nomawi kan chawi loh chin hi a rei tawh takzet.
"Khatih chhung zawnga England tana khel zingah khan tuna min sawiseltu player hluite hi an awm nual a, a harsatzia an hre ve vek. Chu chu thil dik chiangsa a ni a, major tournament-a England tana inlan hautakzia an hria a ni," a ti!
Kane-a lungawi lohna a awm a, chutihrual chuan khelmual pawn aiin khelmual chhungah chhanna pe se, fans tam takin an duh zawk ang - zaninah hun ṭha an nei dawn a, bawh pelh loh a ngai.
Engtin nge?
Southgate-a'n Liverpool right back Trent Alexander-Arnold chu midfield-ah a enchhin a, a hlawhtling lo. Arnold hi ball pet thiam tak ni mah se, a khelh ngai lohna midfield-a Declan Rice nena an inkawp hi eng ruai an ang lo a, kawh rawn a hlawh mek.
Arnold hi a fuh lo a ni ringawt lo a, Southgate-a'n a thlak nana a hman ṭhin Conor Gallagher pawh a fuh thei chuang lo. Tlarhmaah Jude Bellingham hi Real Madrid-a Jude kha a ni ta lo em ni chu aw, tih mai tur a ni a, Phil Foden leh Bukayo Saka ten beisei an phak lo bawk.
Hetiang boruak karah hian Southgate-a'n khelh dan a thlak ngei a rinawm a, number 10-a awm Bellingham hi tawlh hnungin, Declan Rice nen ding dun se, Manchester City tana a inlan angin Foden hian tlarhmaah zalenna nei se, a fuh mai thei.
Chuti a nih chuan mual sir aṭanga goal nawr pui turin Anthony Gordon emaw Eberechi Eze an lut thei ang. Hei ringawt hi buaina chinfelna tur erawh a ni lo - Saka-a'n Arsenal-a a khelh dan anga a khelh a ṭul a, Harry Kane a taimak thar leh a ngai.
Hmasawn mamawh
England boss Southgate-a'n hmasawn an ngai tih a hai lo. English coach chuan, "Kan khelh danah hmasawn kan ngai tih kan hria a, mahse, kan goal khung dan leh point hmuh dan hi en ula, Euro 2020 nen khan a inang asin aw..." a ti!
Three Lions hian Euro 2020-ah khan final an lut a, penalty-ah Italy ngam loin, champion nomawi an chawi ta lo. World Cup 1966 hnua major tournament-a la champion lo England-in nomawi chawi an duh a, mahse, an khelh danin nomawi lam a hawi si lo.
Southgate chuan sawi zawmin, "Kan position-ah kan chian a ngai a, thil inthlak danglam turah kan inher rem thiam a ṭul a, kan theihna hi kan rintawk a ngai," a ti a, a naute chu an theihna sang tak hmang chhuak turin a fuih.
England tan fan-te rinna hlawh a, beiseina nena nomawi thlir turin Slovenia hneh a ṭul a, zaninah chak satliah lo a, game hmuhnawm an pho chhuak thei a nih ngat chuan an boruak chhe tawh hi a fuh leh thei ang.
Slovenia an ṭha
Three Lions tan Slovenia laka awlsam taka chak tura inbeisei bik ngawt erawh a fuh lo ang - he team hian Denmark leh Serbia inhnehtawkpuiin, round of 16 luh beiseina an la nei ve a, thih tha nen an bei ang.
Southgate chuan, "Player khelh dan phung hrang hrang an kawl nual a, Slovenia-in kan hmaa chona an chhawp hmachhawn turin kan inbuatsaih ang - player ṭha tak tak pawh an nei a, a bik takin tlarhmaah an ṭha hle," a ti.
Slovenia hian si ban nghak tur pawhin khawvel huapa keeper ṭha Jan Oblak an nei a, tun inelnaa goal khung harsat England tlarhmaten an paltlang thei ang em, tih chu thil hriat châkawm a ni ta.
Tlarhmaah RB Leipzig striker Benjamin Sesko hi ven bik ngai tur a ni a, Panathinaikos striker Andraž Šporar pawh a rintlak viau - mak angreng tak erawh, tun inelnaa Slovenia goal hnih khung hi defender khung ve ve a ni.