Netherlands dinhmun a derthawng

Euro 2024-ah team an intluk tawk hlawm hle. Netherlands-in hneh loh la tawng lo mah se zanin dar 9:30-a Austria an hneh loh chuan la tla thei an ni. Group D inkhel dangah France leh tla tawh Poland te an inkhel bawk ang.

Oranje hian team ṭha France an chelh thei a, Xavi Simons goal pawm ngat se chuan chak thei an ni zawk. Match hnihah point li hmu mah se Ralf Rangnick hnuaia game nung ṭha tak khel thei Austria an hneh loh chuan, tla thei dinhmunah an ding dawn.

Netherlands hian Euro 2024-ah hliam vangin Barcelona midfielder Frenkie de Jong leh Atalanta midfielder Teun Koopmeiners te an hruai tel thei lo a, AC Milan midfielder Tijjani Reijnders-a'n hming chher nan a hmang thung.

Ronald Koeman-a hote hian belhchian an dawl a, chutihrualin Austria lakah fiahin an awm dawn. Ram inelnaah ram hmangaih player an danglam ṭhin a, Euro 2024-ah Austria midfielder Marcel Sabitzer chu player ṭha ber zinga mi a ni. Oranje tlarhnung tan pawh a hnawksak thei ang.

France pawh pathumna nih theih dan awm bawk mah se Kylian Mbappe hmaikawr nen a rawn kir theih tawh avangin Poland laka point thum hlawh chhuak thei tura ngaih an ni.