Germany chhantu Fullkrug

Euro 2024-ah inelna thlengtu Germany chu chak lo thei dinhmunah an ding a, minute 90-naah pawh Switzerland lakah 1-0 in an la hnufual. Injury time minute hnihnaah Niclas Fullkrug-a'n siphurh sutna goal a tauh lut a, 1-1 in inkhel a tawp.

Germany-in point sarih hmuin group A pakhatna an ni a, Switzerland-in pahnihna nichungin last 16 an lut ve bawk. Deutsche Bank Park, Frankfurt-a inkhelah hian Switzerland-in pressure an pe ṭha a, Germany player-te an hnaih zel avangin Julian Nagelsmann-a hote an che thei lo.

First half-ah Robert Andrich-a'n box pawn aṭangin a pet goal a, VAR hmanga ennawn a nih hnuah Jamal Musiala-a'n Swiss defender a pet fuh avangin pawm a ni lo. Goalkepeer Yann Sommer-a tihsual a pawi thui ta lo.

Switzerland hian Dan Ndoye hmangin an khung ta zawk a, Bologna winger hi Jonathan Tah-a'n a dang hman lo. Goal luh hnuah Ndoye hian Antonio Rudiger pawh a tlan pel leh a, goal pawnah chiah a pet.

Germany chungnung mah se Switzerland-in chance an nei ve tho a, hun tawp dawn hnaiah substitute Ruben Vargas-a'n goal khung belhah a inngai a, mahse offside vangin pawm a ni lo. Hemi hnu hian Neuer-a'n ṭha zetin Granit Xhaka pet a dang leh bawk.

Murat Yakin-a naute ṭang thei viau a, inelna thlengtu hneh ngei tumin ṭan an khawh hle. Mahse, Fullkrug-a'n out and out striker danglamna a rawn pholang a, David Raum-a cross chu Borussia Dortmund striker hian ṭha zetin a tauh lut.

Julian Nagelsmann-a'n group match-ah starting eleven ngai vek a hmang a, last 16-ah erawh loh theih loin a thlak a ṭul dawn. Ruidger-a dinpui Tah-a'n yellow card vawi hnihna a hmu a, last 16-ah a inlan thei dawn lo.

Germany coach Nagelsmann chuan, "Kan khelh dan hmang kan bel theih nan starting eleven thlak kha kan tum lo. Yellow card hmu tawh kan luhtir chhan kha chu, ka player-te ka rin vang a ni. Kan squad-a awm player-te hi ka chhawr ngam vek," tiin inkhelh banah a insawifiah.