Messi tan record thar a hnai

Argentina chuan Nilaini zing dar 6:30 hian Chile an hmachhawn dawn - Lionel Messi a inlan a nih chuan Copa America bika a match 35 khelhna tur a ni dawn a, he tournament bika match khel tam ber a ni ang.

South American rama football hmanga inelnaah hian Chilean goalkeeper Sergio Livingstone leh Messi te hi match khel tam an ni a, record inṭawm an neih chu Messi hian tun inelna chhung ngeiin a kalsan dawn a ni.

Nimin khan Messi hian kum 37 a tling a, a piancham lawm nan Argentina tana goal khung a châk zual hle ang. An match hmasa lama Canada an hneh ṭumin goal khung lo mah se a hmuhnawm a, tun ṭumah pawh en bik a ni leh ang.

Argentina tlarhma a chhah ṭha a, captain Messi chu khawih chet thiang lo a ni. A kianga khel turin Angel di Maria a la ṭha tawk a, Manchester City striker Julian Alvarez an neih bakah Lautaro Martinez an nei cheu bawk.

Inter Milan striker Martinez hi season hmasa Serie A goal khung hnem ber kha a ni a, player ṭha ni mah se a bul ṭantu zingah a tel phak lo, bench aṭanga lutin goal erawh a khung tho - Chile lakah minute tam zawk a khel a nih pawhin a mak lo ang.

Premier League lama hming chher mek Alejandro Garnacho leh Enzo Fernandez te an la inlan ve lo a, Manchester United leh Chelsea duhlai te tan kawng a inhawng bawk a, chutihrualin training na lama chetṭhat a ngai ve hle ang tih a rin theih.

Chile hian kum 35 mi Alexis Sanchez leh Eduardo Vargas (kum 34) te chu tlarhma lama an rinrawl a la ni a, an vanglai a pel tawh - chutihrualin tawnhriat an nei ṭha a, huaisen taka khingpuite hmachhawn ṭhin an nih avangin Argentina tlarhnung tan ngaihthah an rem lo ang.