Uruguay an chak nuamsa

Maximiliano Araujo-a'n box pawn aṭangin goal mawi a khung a, hun tawp dawn lam hnaiah Darwin Nunez leh Matias Vina ten an khung belh bawk - Uruguay chuan Copa America 2024 an match hmasa berah Panama 3-1 in an hneh.

Nimin zing Hard Rock Stadium, Miami-a inkhelah Marcelo Bielsa enkawl Uruguay an hmuhnawm, a tir aṭangin goal an nawr na hle a, minute 16-naah winger Maximiliano Araujo chuan goal mawi a khung - keeper Orlando Mosquera tan dan phak a ni lo.

World champion hmasa ber hian nawr na zui viau mah se goal khung belh erawh an harsat angreng. Hun tawp hma minute nga chauh awm tawhah Liverpool striker Nunez chuan Panama defender ball tauh chhuah fuh tawk lo chu laklawh nei loin a khung.

Nunez-a'n ram tan match 24 a khelh aṭangin goal 12 a khung ta a, mual sir lamah Luis Suarez hmel hmuh tur a la awm bawk, tlarhma lama chhawr tur an nei ṭha tawk hle, hun tawp hma deuhin Vina chuan an goal thumna a tauh lut.

Uruguay hian player an nei ṭha - Real Madrid duhlai Federico Valverde-a'n midfield a ho khawm thei a, tlarhnungah Brcelona defender Ronald Araujo an nei bawk, a vawi 16 nana Copa America champion ni turin theihna an nei.