Number 1 Sinner a champion

Jannik Sinner chuan mipa tennis world number 1 a nih hnua a vawi khat nan nomawi a chawi - Wimbledon inbuatsaihna zinga mi Halle Open champion a ni a, grass court bika title a lak hmasak ber a ni hial.

Italian tlangval hian Pathianni zan final inkhel hmuhnawm takah Hubert Hurkacz chu 7-6(8), 7-6(2) in a hneh a, tennis a khelh hun chhungin singles bikah nomawi 14 a chawi tling ta chiah bawk a ni.

Sinner leh Hurkacz te hi ṭhian ṭha tak an ni, tun inelna Halle Open-ah pawh hian doubles huangah an ṭang dun a, singles lamah final an lut ve ve bawk a ni, set pahnihah tie break khelh ngai khawpin an inhnehtawk hle.

Kum 22 mi Sinner chuan, "Wimbledon atana inbuatsaihna ṭha tak a ni. Season hmasa khan grass court inelna lian berah khan semifinal ka thleng a, kuminah chumi aia sang thlen ka tum ang.

"Nikum ai chuan inrintawkna pawh ka nei sang tawh hle a, tuna kan inkhelhna Halle Open leh Wimbledon khelhna grass chu a inang lo deuh a ni mai thei, mahse inbuatsaih nan chawlhkar khat ka la nei," a ti.

Wimbledon an khelh hunah chuan Sinner hi seeded pakhatna a ni dawn a, champion tura rinkai pawh a ni. Nomawi kawl mektu Carlos Alcaraz a inlan dawn bawk, tennis player chhuak thar ṭha pahnih hian inelna hmuhnawm an chawp chhuak leh ngei ang.

Chak lo zawk Hurkacz pawhin lawmpuina thu sawiin, "Tun hnai thla 12 chhunga i khelh dan hi a ropui hle a, dinhmun sang tak luah hi i phu a ni. Ṭhian duna final kan khel thei hi ka lawm, i hnen aṭangin thil tam tak ka zir chhuak," a ti.