Vawiinah Nexa MBA Official Championship 2024 ṭan dawn

Mizoram badminton-a inelna ngaihhlut hlawh leh lian ber, Badminton Association of India (BAI) hriatpui NEXA GIG MOTORS MBA Official Championship 2024 chu vawiin aṭang hian neih ṭan a ni dawn a, inelna hi junior leh senior-a neih tur a ni - MBA YouTube channel lamah live-a en theih a ni ang.

Ramhlun Indoor Stadium-a neih tur inelnaah hian junior bik hi June 25-29 chhung neih tur a ni a, Under-11 aṭanga Under-19 inkar category hrang hrang 16-ah inelna neih tur a ni - player 215 zetin hming an pe lut a, match 280 chuang en tur a awm dawn.

U15 Boy's singles-ah entry 47 lai awmin, category pakhata entry luh tamna ber a ni. Entry a tam tham deuh avângin Junior category bik hi hmun hnihah khelh a ni dawn a, Ramhlun Indoor Stadium bakah Govt. Mizo High School Hall, Chanmari chu inelna ṭantir lamah hman tel a ni ang.

Senior inelna bik hi July 2-ah ṭan ve chauh tur niin, July 6 thleng a awh dawn a, category panga - Men's singles, Women's singles, Men's doubles, Women's doubles leh Mixed doubles-ah te inelna neih a ni ang.

Player langsar

MBA Championship-ah hian player langsar an tel nual dawn a, tun hnaia All India Sub-Junior National Ranking Tournament-a bronze medalist Sainunmawia Sailo, Ramhlun Venglaiin category pathumah inelna a hmachhawn dawn a, junior mai bakah senior inelnaah a tel ang.

Sainunmawia u Saitluangpuia Sailo pawhin senior inelna a hmachhawn dawn a, an unau hian Kotak Pullela Gopichand Badminton Academy (KPGBA)-ah an inzir mek. Serchhip rawlthar ṭhangduang, National Ranking Tournament-a champion thei Malsawmhlua (Mama) pawhin category pathumah inelna a hmachhawn dawn a, ani hi KPGBA-a inzirlai mek tho a ni.

BAI-in badminton thiam bikte inzirna atana a din National Centre of Excellence, Guwahati-a awm mek C. Lalramsanga, Durtlang pawh a inlan dawn a, ITM University Badminton Academy-a inzir mek, Vanlalpekhlua Sailo leh Vanlalhruaia Sailo te unau pawh he tournament lian khel tur hian an rawn haw bawk.

TATA Trusts (NEIDA) leh MBA te thawhhona aṭanga din, Aizawl leh Serchhip-a Regional Intensive Training Centre-a coaching kal mekten inelna hi an hmachhawn vek dawn a, Grassroot Centre hmun 25 aṭangin player an rawn in lan nual dawn bawk.

Hmeichhe lam

Hmeichhe lamah pawh player hmuhnawm bik inlan tur an awm nual - National Centre of Excellence, Guwahati-a inzir mek Lalrempuii'n eng ang chiaha thiam nge a nih, Mizo mipui hmaah a 'show' dawn.

KPGBA a training nei mek, H. Lalrinhlui, Chanmari West leh Zoramthari Renthlei, Champhai Vengthlang te pawhin inelna an hmachhawn dawn a, Anup Sridhar Badminton Academy, Bangalore-a traning nei mek Lalrinkimi, Mission Veng pawh medal hawn ngei beiseiin a lo haw.

Hmeichhe inelna lamah hian Women and Child Development, Govt. of Mizoram te, TATA Trusts (NEIDA) leh MBA te thawhhona hnuaiah hmeichhe lam, tournament-a tel an pun theih nan hma lak a ni a, lawmmana an dawn pawisa fai a pun bakah Grassroot Centre ti ṭhate tan lawmman siam a ni bawk.

He thawhhona hi Mission Shakti hnuaia Beti Bachao Beti Padhao (BBBP) programme hnuaiah neih a ni a,TATA Trusts hian 'Girl Child Promotion' hnuaiah programme chi hrang hrang siamin, chung zinga pakhat chu he thawhhona hi a ni bawk.