Norris hmaah Verstappen a thleng

Max Verstappen chuan a zawna a vawi thum nan Spanish Formula One Grand Prix-ah hnehna a chang a, a hmasa ber aṭanga tlan chhuak Lando Norris hmaah a thleng.

Red Bull driver Verstappen hian bul a ṭan fuh a, a tir lamah Norris hi che fuh lo hretin a hmahruaina a hloh a, a tawpah chuan McLaren driver hi second 2.2 in a hnufual ta zawk a ni.

World champion vawi sarih ni tawh Lewis Hamilton chu pathumnaah a thleng ve thung. Mercedes driver Hamilton tan tun season chhunga dawhsan (podium) a lawn hmasak ber ṭum a ni hial.

British tlangval Hamilton hian Mercedes tan season hnuhnung ber a hmang mek, season tharah chuan Ferrari car a khalh tawh dawn, a hnungah hian a teammate George Russell a thleng thung a ni.

Tun hnai season li chhung chu Verstappen-a'n amah el phaktu a tawng lo tia sawi theih a ni, tun season kal laiah pawh amah hnaih bertu Norris aiin point 69-in hma a hruai fal tawh a, nomawi kawl lai a humhim ngei a rinawm.

Dutch tlangval Verstappen chuan, "Tun ṭum intlansiakah chuan a bul ṭanna kha a pawimawh zual hle, a tira ka chet fuh hlauhna khan a tawp thlengin min pui niah ka ngai, ka tawn kawng thui takin a inhawn phah.

"A hmasa bera tlan tawh chuan mahni inven a ngai tel a, khami boruakah tak khan Lando leh McLaren kha an rawn che na hle a, min nawr nat em avang khan chetsual pawh a hlauhawm, mahse Red Bull lamin hna kan thawk ṭha ve bawk," a ti.

Ferrari driver Charles Leclerc chu panganaah a thleng, a hma a mi Russell a phak lohna chu second 0.3 chauh a ni a, a hnungah a teammate leh tualchhung tlangval ni bawk Carlos Sainz chu a thleng thung.

Season kal laiah intlansiak vawi 10 awm tawhin vawi sarih zet chu Verstappen hi a chak tawh a, F1 huangah ṭum 61 chak tling tawhin point 219 nen hma a hruai mek.

Khawvela car intlansiakna sang leh ngaihhlut hlawh ber hi June 30, Pathianni zan tir dar 6:30-ah an tlan chhunzawm leh dawn. Red Bull Ring-ah Austrian Grand Prix an tlan dawn a ni.