Hunthar an inhnukdawk

Pro Volleyball League (PVL) champion lai Hunthar Volleyball Club chuan Pro Division aṭanga an inhnuhdawh thu an sawi a, season tharah tualchhung volleyball inelna sang berah an tel chhunzawm dawn tawh lo tihna a ni.

Hunthar chuan thuchhuah siamin, "Hunthar Volleyball Club chuan ngun taka a ngaihtuah hnuah Pro Division a awm zel thei niin a inhre ta lo a, season thar atang chuan Pro Division-ah Hunthar Volleyball Club ziah luh a ni dawn tawh hrih lo a ni.

"Hunthar Volleyball Club erawh nghet takin a ding zui zel dawn a, division hniam lamah mipa leh hmeichhe team neih tumin hma a la chhunzawm ang," an ti a, inelna sang hmachhawn dawn lo mah se a hniam lamah erawh hmalak an tum.

PVL vawi thum champion tawh leh nomawi chawi hnem ber Hunthar club thuneitu lam aṭanga Vanglaini thu dawn dan chuan, senior team aiin naupang chher leh tuaihriam lama hun hman tam zawk rih an duh a, heng bakah hian sum leh pai chu harsatna a ni tel tih an sawi bawk.

Mizoram Volleyball Association (MVA) hnuaiah hian division hrang hrang an awm, chung zingah chuan Pro Division hi a sang ber niin, tun dinhmunah - Thutak Nunpuitu Team (TNT), Chhinga Veng Spikers, Tuichangral, Durtlang North leh kai thar Khawbel te an awm mek. Hunthar an inhnuhdawh tak avangin hmun ruak pakhat a awm dawn niin a lang.