T20 Cricket World Cup England leh South Africa ten semifinal an lut

T20 Cricket World Cup-ah champion lai England-in bul ṭan ṭha lo mah se semifinal lut hmasa ber an ni. June 23, Pathianni zan khan England-in United States chu wicket 10 zetin an sawp a, Super 8-ah an theihna tak an lantir. Nimin zing khan South Africa-in DLS Method hmangin West Indies wicket thumin an hneh a, semifinal an lut ve bawk.

Nizan khan Australia leh India an inkhel a, tukin zing dar 6:00-ah Afghanistan leh Bangladesh te an inkhel. Group A aṭangin India, Australia, Afghanistan leh Bangladesh ten semifinal beiseina an nei vek a, Men in Blue dinhmun a ṭha ber. Rohit Sharma hote hian hnehna an chang a nih chuan an group-ah pakhatna an ni ang a, semifinal-ah England an hmachhawn ang.

A hunah England

Cricket World Cup-ah inelna boruak a sang chho a, England an ṭha ṭan chiah. Kensington Oval Barbados-ah Three Lions-in vawm hmasak an thlang a, United States-in 115 runs chauh an siam thei a, over 18.5-ah an thi fai vek.

English bowler Chris Jordan chuan hattrick a siam a, England bowler zinga T20 World Cup-a hattrick siam hmasa ber a ni. US hian tun ṭum inelnaah Pakistan hial hneh mah se England hmaah an zawr.

Englang bat hun a thleng a, Phil Salt (25) leh Jos Buttler (83) ten an thiam thil an rawn pholang. Captain Buttler hian ball 38 lekah 83 runs a siam a, four vawi ruk leh six vawi sarih hlap chhuakin over 9.4 lekah England-in 117 runs siamin hnehna an chang.

Windies ngamtu Proteas

England-in US an hneh avangin semifinal an lut a, hmunruak pakhat hi South Africa leh West Indies ten an inchuh. Antigua-a inkhela chak zawk hian semifinal an luh dawn avangin quarterfinal ang hiala ngaih theih a ni.

Sir Vivian Richards Stadium-ah South Africa-in vawm hmasak an thlang a, Windies chhuanvawr Shai Hope (0) leh Nicholas Pooran (1) te che ṭha lo mah se opener Kyle Mayers (35) leh Roston Chase (52) te chet ṭhat zarah 135/8 runs an tlin.

South Africa tan hna harsa awmin a lang lo a, mahse Windies bowler Andre Russell-a'n Quinton de Kock leh Reeza Hendricks te wicket lain over hnihnaah 15/2 a ni. Windies khelh ṭhat lai takin ruah a sur a, minute 75 an chawl.

DLS Method hmangin target siamṭhat a ni a, over 17-ah 123 runs siam a ngai. Ruahsur zawhah South Africa an insiamṭha hret a, mahse Roston Chase-a'n wicket thum rawn lain inkhel entu mipui a tiphur hle.

Mahse, pressure sangah South Africa an tlo a, Marco Jansen (21) leh Kagiso Rabada (5) ten a tawp an thlenpui. Over 17-na (over tawpna) ball hmasa berah Jansen-a'n six runs a vaw chhuak a, Proteas hi wicket thumin an chak.