Beisei nei Hungary, Scotland an tla

Euro 2024-ah Hungary-in minute 100-naah Kevin Csoboth goal hmangin Scotland an hneh a, last 16 luh theihna kawng a la inhawng. Scotland erawh an chak loh avangin group A table mawngphahah awmin an tla.

Stuttgart Arena-a inkhelah Scotland-in chak mamawh mah se counter attack-ah an innghat a, shot on target pawh an nei lo. Hun tawp lamah Scotland inkhel a nung hret a, Stuart Armstrong-a'n penalty beisei mah se pek a ni lo. Coach Clarke-a'n inkhelh banah penalty ngei a nih tur thu a sawi a, penalty chu hmu se Scotland tan last 16 luh theihna kawng zau tak a inhawng ang.

Mahse, Scotland hi penalty pek an ni lo a, injury time-ah pawh minute 10-naah Roland Sallai cross chu Kevin Csoboth-a'n goal-ah chantirin Hungary 1-0 in an chak. Scotland beisei a tawp a, inelna lian thamah knockout stage an la lut lo. Injury time rei chhan hi, Scotland goalkeeper Angus Gunn leh Hungary player Barnabas Varga te insut vang a ni.

Kum 29 mi Varga hi hun rei tak buaipui a ni a, damdawi inah hruai zui a ni. Ferencváros forward hi tun inelnaah a inlan chhunzawm thei dawn lo. Varga hi hmai ruh a khi a, hliam a tawrh hlim hian thih hlauhawm ni mah se damdawi in hruai hnuah ngaihtuahawm a ni tawh lo.