Queen’s Club tennis champion chu Tommy Paul

Tommy Paul chuan Amercan tennis player ṭhate huangah a hming a nemkai zel - Wimbledon inbuatsaihna zinga mi Queen’s Club Championships title a vaw chhuak.

Pathianni zana final khelh zawh takah Paul hian a khingpui Lorenzo Musetti chu 6-1, 7-6 (10/8) in a hneh a, seeded pangana hian ATP Tour title panga a lak tlinna niin, tennis a khelh hun chhunga a nomawi chawi len ber a la ni.

Kum 2010 khan Sam Querrey chuan Queen's Club-ah hian hlawhtlinna a lo chang tawh, ani hnuah chuan Paul hi American tlangval zingah he hmuna hlawhtling leh thei hmasa a ni hial.

Tun hma chuan American hranghlui John McEnroe, Jimmy Connors leh Pete Sampras te an lo champion tawh a, player ropui bikte hian Wimbledon title an la zui bawk - Paul hian an hnung a zui thei dawn em, tih chu kan hre thuai dawn.

Kum 27 mi Paul chuan, "Ka tan chuan a hlu takzet. Tennis court aṭangin locker room lamah ka lut a, mi ropuite kiangah ka hming an lo ziak ve tih hmuh ringawt pawh lawm veng vengna tham a ni," a ti.

Tun dinhmunah Paul hi world number 13 a ni a, thla thara world ranking chhuak tharah chuan hma a sawn dawn - Taylor Fritz khumin American bikah chuan number 1 a ni ang.