Apuia'n Mohun Bagan a zawm ta

Mizo midfielder lar, Indian football titi luahtu Lalengmawia Ralte (Apuia) chuan Mumbai City chhuahsanin Mohun Bagan Super Giant a zawm ta - Kolkata club hian nimin khan Apuia an lakluh thu hi official-in an puang a, hemi hma hian Mumbai City chuan an player an chhuahtir tur thu hi an puang tawh.

Apuia hian Mumbai City-ah contract la nei mek mah se, a contract-ah hian vaibelchhe 1.6-a dawrtu an awm chuan a chhuah theih tur thu a inziak tel a, Kolkata club hian Vaivakawn tlangval tana heti zat sen an inhuam avang hian Mumbai tan tih theih a awm lo.

India international Apuia chuan, "Mohun Bagan hi club lian leh sulhnu nei ropui tak an ni a, chu chuan min hip ve bawk. Hemi piahlamah hian AFC Champions League 2 an khel dawn a, chu chu he club zawm tura min hmintu pakhat a ni," tiin Vanglaini a hrilh.

AIFF Elite Academy aṭanga inzir chhuak Apuia hian FIFA Under-17 World Cup 2017 aṭang khan hriat a hlawh ṭan a, India tan hian age level Under-16, U17 leh U23 thlengin a inlan a, senior team tan match 18 a khel tawh bawk.

Indian Arrows aṭanga a professional zinkawng zawh ṭanin, kum 2019 khan NorthEast United a zawm a, heta ṭang hian a hming a chher ṭan - November 2020 khan Highlander tan captain armband hrengin, ISL-a captain ni thei naupang ber record a siam a, kum 20 leh ni 44 mi a ni.

Apuia hi 2020-21 season-ah hian ISL Emerging Player of the Season atan thlan a ni a, FPAI Young Player of the Year-ah thlan a ni bawk. Mumbai City-in Highlander aṭang hian an lei chhuak a, a man atan vaibelchhe hnih insengin, a hun laia ISL player man to ber record a siam.

Mumbai City hian kum nga chhung atan contract pein, vaibelchhe 11 hu contract a ziak. ISL hian season thar aṭangin season khata squad pumpui tana player hlawh atana sen theih zat, cheng vaibelchhe 16.5 chu vaibelchhe 18-ah an tisang a, hei bakah hian vaibelchhe 18-ina a huam loh, 'salary cap' pawna player pahnih neih theih dan a awm bawk.

Bagan chuan Apuia hi 'salary cap' pawnah an register dawn a, he dan hmang hmasa ber an ni - a tawi zawnga sawi chuan Bagan hian Apuia hlawh atan sum an seng nual dawn tihna a ni.

Mohun Bagan boss Jose Molina chuan, "Apuia hian kan midfield a tichak sawt dawn - tun hnaiah league-a player langsar pawl a ni reng a, India tan pawh player pawimawh a ni phak. Kan midfield-ah inelna ṭha zawk a rawn thlen thei dawn a ni," a ti a, a midfielder thar chu a lo lawm.