Last 16 khel tur England an la harh lo!

European Championship 2024-ah group hmahruaitu ni chungin England-in round of 16 an lut a, mahse, fans erawh an lawm a la kim chuang lo - an khelh danah lawmna tur a awm miau lo a!

Three Lions hian Thawhlehni zan khan Slovenia chu 0-0 in an inhnehtawkpui a, match thum aṭangin point nga an hmu - Slovenia nen an intum hma pawhin England hian round of 16 an lut tawh a, Slovenia nen an indraw avangin hmahruaitu an ni ta chiah.

Mahse, Gareth Southgate-a naute hian goal hnih chiah an khung a, an lamah goal khat a lut. An khelh danah mit titlai hmuh tur a awm lo a, "Runah football a lawi dawn e," tia football inti neitu ngam ngat ram hian football mawina an pho chhuak zo lo.

Group C inkhel dangah Denmark leh Serbia chu 0-0 in an inhnehtawk a, Denmark hian pahnihna niin Three Lions hnung an zui a, Slovenia pawh pathumna ti ṭha pali zingah telin last 16 an lut ve bawk.

Awmze nei lo

'Golden Generation' hminglem an pekten an beisei nomawi an hlawhchhuah sak lo a, chumi hnuah chuan tun 'generation' hi England-in beiseina sang tak nena an thlir leh chu an ni. Mahse, coach atan Gareth Southgate an nei a, English coach hnuaiah an la vul thei lo.

Three Lions hian Slovenia lakah 74% zet ball changin, vawi 12 shot nei mah se, goalkeeper ṭha mi Jan Oblak tan hna hautak tia sawi tur an chhawp thei lo a, Slovenia tlarhnung inrem ṭha tak chu paltlang an harsat tlat.

England tan Bukayo Saka chuan goal a khungah inngai mah se, offside vangin pawmsak a ni lo a, he goal luh theih nana Declan Rice leh Phil Foden ball inpe vel chu hmuhnawm tling mah se, goal atan pawm a nih loh miau avangin awmze nei lo a chang.

Chawlhlawk hman a nih dawn meuh chuan England hi fan-ten an au el hial a, second half-ah insiamrem hret mah se, inkhel hmuhnawm erawh an pho chhuak chuang lo a, goal an khung thei lo - hun tawp dawnah a vawi khat nana inlan Cole Palmer chuan chance duhawm a nei a, a chhawr lo.

Hey Jude!

Bellingham-a'n season hmasa ṭan dawn khan Real Madrid a zawm a, Spanish football club huhang ngahah insiamrem turin hun a mamawh lo - a hmuhnawm nghal em em a, La Liga Player of the Season a nih bakah Champions League Young Player of the Season a ni tel a, inelna pahnihah hian nomawi a chawi nghal bawk.

Fans tam takin a lakah beiseina an nei sang a, tun Euro-ah a che ṭha chhunzawm a nih ngat chuan Ballon d'Or dawn thlengin an sawi ri. Mahse, 'Hey Jude' tia kan fak chamchi kha tunah chuan a bo rih a, Serbia laka goal a khung hnuah kan la hmu leh rih lo.

Bellingham hian a thiam a theihnghilh ta thut em ni? tih palh mai a awl rum rum a, fans tam takin England champion puitu tura an ngaih kha tun dinhmunah chuan vantlang hnuai lam player a ni mek - knockout-ah pawh a la harh chhuak lo a nih chuan England zinkawng titawitu zinga mi a ni thei.

Kum 20 mi midfielder hian pressure a zo ve ta lo mai em ni? 'Nge Southgate-a 'system' nen a inrem lo zawk? Slovenia hmangin kan zawhnate chhan beisei a nih laiin zawhna tam tak a hrin belh ta zawk a, England hian hawi lam an nei rih lo.

Arnold aiah Gallagher

Southgate-a'n Liverpool right back Trent Alexander-Arnold chu England midfield buaina chinfelna tur nia ngaiin midfield-ah a dah a, mahse, a match hmasa pahnihah Arnold-a'n beisei a phak lo ve ve a, kawh rawn a hlawh.

England match hmasa pahnihah hian Conor Gallagher chu Arnold lakchhuah a niha thlaktu ve ve a ni a, Southgate hian Chelsea midfielder hi buaina chinfelna a ni lo tih chu hrethiam tawh tur a ni. Mahse, Slovenia lakah Arnold chu bul ṭantuah a awm lo a, a aia lut chu Gallagher a ni!

Gallagher-a'n Slovenia lakah pawh eng ruai a thawk lo a, second half-ah Manchester United rawlthar Kobbie Mainoo chuan a thlak - Mainoo luh hnuah Three Lions midfield-in awmzia a nei deuh a, Southgate-a'n a ngaihtuahna a sen nawn a ṭul.

Kum 24 mi Gallagher hian khelmualah minute 45 hun a hman chhungin vawi 20 pass a nei a, heng zinga vawi sarih chiah hi khingpui lam hawia a pass a ni a, vawi li ball a hloh - vawi khatmah dribble a nei lo a, chance a siam lo a, shot a nei lo a, tackle a nei miah lo bawk.

Buaina chu tu nge?

Arnold-a'n a khelh ngai lohna position-ah a khel a, England-in beisei an lo phak lo bawk nen, dem rawn a hlawh. Mahse, chik taka thlir chuan Reds player hi group stage-a England tana chance siam hnem ber a ni a, minute 90 dana 2.1 chance siam zel ang a ni.

A tawi zawnga sawi chuan Bellingham, Premier League Player of the Season Phil Foden leh Arsenal chhuanvawr Bukayo Saka te aiin midfield aṭangin chance a siam hnem zawk tihna a ni - minute 129 chiah khelmualah hun a hmang mah mah!

Arnold hi a khel ṭha viau, tihna erawh a ni lo a, an kawh rawn angin a khel chhe bik a ni lo, tihna zawk a ni. Foden hian Manchester City-a a khelh dan angin tun thlengin a la khel lo a, Saka lah hi Arsenal-a kan hmuh ṭhin Saka tho kha a ni ang tih a rinhlelhawm rum rum.

Captain ber Harry Kane hi 'leader' a ni lo tih kan hmuh chhunzawm zel a, a thawkrim tawk lo bawk. Tlarhnung an nghet pangngai viau a, a tawpkhawka mawhphurtu ber erawh Southgate a ni - La Liga leh Premier League player ṭha ber kawltu, Bundesliga top scorer neitu ni bawk Southgate hian hei aia ṭha zawka an khelh dan tur a ngaihtuah chhuah a ṭul

a ni.