Fan-ten England an au el

England-in match thum khelh hnuah pawh game hmuhnawm min la chhawpsak thei lo a, Three Lions fan-te an lawm thei lo. Inkhelh zawhah an player-te ngei an au el a, coach Gareth Southgate chuan kut beng chunga lawmthu sawi turin fan-te pan mah se, fans ṭhenkhatin au el mai duh tawk loin, tui inna bur ruak leh no ruakin an lo vawm!

Euro 2020 final hruai thleng a, World Cup 2018 semifinal-a England hruai thlengtu Southgate chuan, "Engmah hi ka tlansan dawn lo a, a pawimawh ber chu kan team min thlawp zel hi a ni. Fan-ten min sawisel hi ka hrethiam a, player sawisel ai chuan hei hi team tan a ṭha zawk a ni," a ti sam et!

Southgate chuan sawi zawmin, "Mahse, fan-te chet dan hian boruak danglam chu a siam ngei alawm. Team dang, round of 16 lut ve thoten kan chunga thil thleng ang hi an tawn ve awm ka hre lo. Mahse, ka hrethiam a, ka hnungtawlh dawn lo. Hetiang boruak kara ka player-te inthunun dan erawh ropui ka ti," a ti.

England coach chuan, "Player leh coach ka nihna angin hetiang boruak hnuaiah hian kum 20 chhung ka thawk tawh. A pawimawh ber chu kawng dik kan zawh zel a, kan thawhho ṭhat tlat hi a ni. Tun hnai kum thum/kum li chhung chu England team nuam tak kan siam a, chu chu player-te tan pawh a ṭhain, kan chhunzawm zel ka beisei," a ti a, sawiselna tam tak karah team chu inlungrual zel se a duh.

Southgate chuan fan-te hnena lawmthu a sawi dawna an lo tihelna chungchang sawi zuiin, "Fan-te hnena lawmthu sawi hi ka chawlhsan dawn lo a, mahse, team-ah harsatna erawh a thlen ve thei. Kei chuan ka pawm zam thei a, player-te erawh thlawp tlat turin ka ngen duh a ni," a ti.

English coach hian Slovenia lakah tun inelnaa la inlan lo Kobbie Mainoo, Cole Palmer leh Anthony Gordon te chu bench aṭangin a luhtir a, an tha a za tih hmuh turin a awm - round of 16-ah Southgate-a'n engtiangin nge player a rem dawn, tih chu thil hmuh châkawm a ni ta.