T20 Cricket World Cup : Zanin dar 8:00-ah India Vs England

T20 Cricket World Cup semifinal-ah champion hmasa ber India-in zanin dar 8:00 hian champion lai England a hmachhawn dawn. Tukin zing hian South Africa leh Afghanistan ten semifinal hmasa zawk an khel bawk.

Inelna kal hmang

Ruahsur vangin inkhel a tibuai a nih chuan result nei turin 10 overs tal a ngai dawn. Guyana-a India leh England inkhel turah hian 'reserve day' dah a ni lo a, chutihrualin 'extra time' a awm. Extra time awmzia chu inkhelh huna ruah sur vanga an zo thei lo a nih chuan minute 250 chhung inkhelh hun hi pawhsei theih a ni ang.

Ruahsur vanga an inkhel thei ta lo tawp a nih chuan, Super 8-a dinhmun ṭha zawkin final an lut ang. South Africa leh India te hi an awmna group-a pakhatna ve ve an ni a, an inkhel thei lo a nih chuan anni pahnih hian final an lut ang.

India hi...

India hi T20 world ranking-ah pakhatna an ni mek a, an champion hnuhnun ber chu kum 2008 daih tawh kha a ni. Rohit Sharma hote hian semifinal thleng tur hian hneh loh an la tawng lo.

Men in Blue hian Pakistan hneh turin harsatna tawk mah se Super 8-ah Afghanistan, Bangladesh leh Australia te harsatna hranpa nei loin an hneh a, champion tura rinkai an ni.

Bowler ṭha mi Jasprit Bumrah-a'n wicket 11 a la tawh a, over khata 4.08 runs ang vel lek a pek bawk avangin team chakna hnar a ni tih a chiang. Left-arm spinner Kuldeep Yadav-a'n match thum chauh a la khel chungin wicket sarih a la tawh a, over khatah 6.25 runs pe ang chauh a ni bawk.

Batter neih ṭhat vanga lar ṭhin India hian Rohit Sharma, Virat Kohli, Rishabh Pant leh Surya Kumar Yadav te kawl mah se tun ṭum chu bowler-ah an innghat tlat.

England ve thung

England hi champion lai an ni ringawt lo a, 2022-a an champion bakah kum 2010 khan nomawi an chawi tawh. Three Lions hian semifinal thleng tur hian harsatna an tawk a, ruahsur vanga Scotland nen an inhnehtawk hnuah Australia an hneh loh avangin tla thei dinhmunah an ding.

Super 8-ah pawh England hian South Africa an hneh lo a, mahse India pawhin harsa taka an hneh United States chu wicket 10 ngawtin an hneh.

US an sawp ṭuma che ṭha, Phil Salt leh Jos Buttler te hi danglamna thlen thei an ni a, Indian bowler-ten an vawm hlum vat a ṭul ang. Kiu (elbow) hliam vanga hun rei tak inhliam Jofra Archer a rawn kir tawh a, English pace bowler hi team tan a ṭangkai takzet.

Three Lions hian 2022 T20 World Cup semifinal-ah India hi wicket 10 ngawtin an sawp. Tun ṭumah erawh Rohit Sharma hote an buk a rit zawk a, mahse rinkai nih hi final thlenna a ni lo - inkhela chak zawk nih a pawimawh ang.