MFA-in ngaihdamna hun a hawng dawn

Mizoram Football Association chuan footballer-ten kum dik taka an khelh dan kawng an zawng a, kum dik loa khelte tan ngaihdamna hun 'MFA Amnesty Programme' a siam dawn.

Tun season (2024-25 season) aṭangin AIFF Centralised Registration Sysytem (CRS) a kum dik loa in register te, an Digital Birth Certificate leh an CRS kum inmil lote tan MFA buatsaih kum bithliah intihsiaknaa an inkhelh theih dan tur kawng a zawng mek.Tunah hian kum felhlelte hian MFA buatsaih kum bithliah intihsiakna an khel thei lo.

Footballer pian ni leh thla (DoB) felhlel vanga inkhel thei lote an inkhelh theih nan Mizoram Sorkar hnuaia Economics & Statistics Department pek chhuah Digital Birth Certificate an theh lut ang a. Registration Committee-in uluk taka an lo endik hnuah document-te a fel fai chuan an kum dik tak huangah inkhelh an phalsak ang.

Hetianga player inpuangte hi an nihna puanzar a ni lo ang a, chutihrualin, AIFF buatsaih tournament-ah erawh Mizoram aiawha thlan theih an ni lo thung ang. Hei hi AIFF Tournament-a AIFF CRS nena ṭangkawpa Competition Management System (CMS) hman a nih vang a ni.

Mizoram Football Association chuan kum dik loa inkhelh a dona kawngah AIFF Annual General Body Meeting (AGM) 2023-24-ah khan kum dik loa CRS-a in register-te hrem loa an kum siam ṭhatna hun hawnsak turin agenda leh ngenna a lo thlen tawh. He ngenna hi a hlawhtlin theih nan Mizoram Football Association chuan hma a la zel dawn a ni.