UEFA Euro C'ship 2024 : France leh Netherlands chungah Austria

UEFA European Championship 2024 ṭan hmaa player langsar ber Kylian Mbappe-a'n goal a khung ta a, mah se champion rinkai France-in beisei an pha lo. Les Bleus hi tla tawh Poland nen 1-1 in an inhnehtawk. Group D-ah France leh Netherlands awm mah se pakhatna dinhmun luahtu chu Austria an ni daih. Ralf Rangnick-a kaihhruai Austria hian match hnuhnung berah Oranje 3-2 in an hneh.

Austria hian group F pahnihna Turkey emaw Czech Republic emaw an hmachhawn dawn a, France-in group E pahnihna an hmachhawn dawn bawk. Netherlands hi pathumna ti ṭha pali zingah an tel a, last 16 an tel dawn. He thu i chhiar meuh chuan team pathumte hmachhawn tur a chiang vek tawh ang.

Mbappe leh Lewy

France-in group match hnuhnung berah hnar ruh tliak Kylian Mbappe bul a ṭantir a, an khingpui Poland hi tla tawh ni mah se an inthlah dul lo. Les Bleus-in Poland tlarhnung ṭhiah an harsat a, first half-ah Theo Hernandez leh Kylian Mbappe te hmangin chance nei mah se goalkeeper Lukasz Skorupski-a'n a dang ve ve.

Second half-ah Ousmane Dembele chu Poland leh Arsenal defender Jakub Kiwior-a'n a titlu a, Mbappe-a'n penalty hi hmang ṭangkaiin chiang takin a khung. Poland substitute Karol Świderski-a'n box chhungah ball ṭha takin a la thla a, Dayot Upamecano-a'n fimkhur loh vangin a titlu. Referee-in penalty pe nghal lo mah se VAR hmanga ennawn hnuah thutlukna dik siam a ni.

Robert Lewandowski-a penalty pet hmasak chu goalkeeper Mike Maignan-a'n dang mah se France goalkeeper hian goalline a pel. Lewy bawkin penalty hi a petna ngaiah bawk a pet leh a, Maignan-a'n dive dik leh mah se a pet kil em avangin dah theih a ni lo.

France-in hnehna an chan theih loh avangin pahnihna nichungin group stage an khar a; Spain, Germany leh Portugal te awmna lamah an awm a, final kalkawng a harsa dawn.

Austria an fei

Netherlands-in Olympiastadion Berlin-a Austria an hmachhawn hmain last 16 an lut tawh a, Ralf Rangnick-a hote tan erawh point khat tal hlawh chhuah a ngai.

Austria-in inkhel bul an ṭan ṭha a, left back Alexander Prass-a'n hmun hlauhawm laiin cross lutin Donyell Malen-a'n an lamah a tlawh lut a, minute rukna chauh a ni.

Rangnick-a hoten goal an khung hnuah pawh ball an chang tam zawk a, chutihrualin team langsar zawk Oranje-in goal chance an nei ṭha zawk. Second half-ah Oranje an rawn che ṭha a, minute 47-naah Cody Gakpo-a'n box chhungah rilru fim neiin mawi zetin a pet goal.

Mahse, Austria-in huaisen taka nawr letin Romano Schmid-a'n ṭha zetin minute 59-naah a tauh lut a, 2-1 a ni lehnghal. Inkhel boruak a nung a, team pahnih an innawr tawn zak zak.

Minute 75-naah Memphis Depay-a'n box chhungah ṭha zeta ball la thlain chiang zetin a pet goal a, referee-in a kut fuhah ngai mah se mual sira 'monitor' aṭanga thil thlen dan a ennawn hnuah goal-a pawm a ni.

Austria tan last 16 lut turin point khat a tawk a, mah se Rangnick-a hote hian chak an tum. Christoph Baumgartner-a ball fing chu Marcel Sabitzer-a'n um lutin 'angle' awm mang lo aṭangin kawh zetin a pet lut.

Austria 3-2 in an chak a, match hmasa berah chak lo mah se point ruk hmuin France leh Netherlands awmna group aṭangin pakhatna an ni.