Silly Point: Hamara Cup?

Nimin mai emaw kan tih chhungin, MS Dhoni-a'n South Africa khawpui pakhat Johannesburg-a ICC T20 World Cup hmasa ber nomawi a chawina pawh ṭhangkhat lian chuang zet chu a liam tawh. Tin, India hian ICC nomawi a chawi lohna hi kum sawm chuang a ni ta bawk a, kumin T20 World Cup-ah hian Hamara Desh mipui nomawi hmuh châka tuihalna thuk tak hi reh thei tawh tak maw.

Rinkai ber India

ICC Trophy leh champion tih sawizawm a inhmeh ve tak Australia team-te Super 8 paltlang zo loin kan mangṭha liam ta a. He thu kan chhiar lai mek hian semifinal hmasa zawkah ICC inelna a irhfiak ching South Africa leh a kum tela hmasawn ram thar Afghanistan te chu Trinidad & Tobago lamah an inkhel mek ang.

Georgetown, Guyana thliarkar lamah zanin hian champion nomawi humhim tum England leh nomawi hum ve châk tawha sahal India an inkhuainuai dawn bawk a ni kha. Heng team pali zingah hian Hamara Desh hi a tawp thlenga dingchang tura rinkai ber chu a ni nameuh mai.

X-Ray positive

Mitthi tho leh wicket keeper batsman, batting line up-a no. 3-a awm Rishab Pant-a pawimawhzia a lang. Bat leh ball hmanga team chakpui thei Hardik Pandya hi India jersey a hak tawh hi chuan player dang daih, IPL vela che nawi tak Pandya a ni ngai lo hi India team tan thu lawmawm a ni.

Arshadeep Singh baka T20 bowler ṭha hi an tam bik lo ang a, Jasprit Bumrah leh Kuldeep Yadav a te form chu sawi loha leng ni ta se. Lehkha a han ziah mai phei chuan, India T20 squad la ṭhat ber tum ni awm tak a ni.

X-Ray Negative

Australia laka hartharna chang ta captain Rohit Sharma leh cricket lalpa Virat Kohli-a te hming tun ṭum chu a langsar lo hle. Virat Kohli meuh pawh mihring pangai ve tho a ni e, tih tilang chiang turin a form a ropui lem lo.

Shivam Dube leh Ravindra Jadeja te hi tun World Cup atan chuan player laklawh, team innghahna ai maha balance tibuaitu an ni zawk em aw a tih theih. Semifinal chinah an pawimawhna an lantir thei bawk.

Come on India

Eng ang pawn sepin han thlirho mah ila, India chu a rinkai ber (favourites) an ni tho tho a. Amaherawhchu, thla riat lek liam ta ICC World Cup final-a an tawlhthluk zeuh ang kha, la thleng ve thei reng a ni. Tun hnai ICC inelna Test a ni emaw, 50 overs a ni emaw, an ze ṭha lo tak an chin fo hi Rohit Sharma leh a naute hian a paihthlak vat a ngai ang.

T20-ah lek phei chuan team lian leh te, a ṭha leh ṭhalo deuh tia kan lo thliar ṭhan ṭhin inkar hi a zauh loh em avangin chetsual a rem lo. India-in ṭum danga an ngam loh ṭhin Australia an hneh tawh a, nomawi chawi tur chuan champion lai England an hneh a ṭul dawn a ni.