Undisputed champion ni tawh lo Usyk

Kum 25 dawn hnua heavyweight boxing champion ni leh hmasa ber Oleksandr Usyk chu a IBF kawnghren chhuhsak a ni a, Ukrainian boxer hi undisputed champion a ni ta rih lo.

Usyk hian May 18 khan Tyson Fury chu split decision-in a hneh a, Saudi Arabia-a inhnek hmuhnawmah hian WBC title a hlawhchhuah belh - Anthony Joshua laka WBA, WBO leh IBF title a lo hlawhchhuah tawh chu a belhchhah a, kawnghren langsar pali a awm hnua undisputed champion hmasa ber a ni hial.

Mahse, IBF danah Usyk hian Daniel Dubois lakah a kawnghren a humhim zui a ṭul a, Ukrainian boxer hian Tyson Fury nen rematch an neih dawn avangin a thei si lo a, IBF title a kawl lai chu hlihsak mai a ngai ta a ni.

Daniel Dubois hian Anthony Joshua chu September 21 hian hmachhawn turin inbiakna an nei mek a, an inbiakna a hlawhtlin theih chuan he fight-ah hian IBF title an inchuh ang. Usyk chuan, "Anthony leh Daniel te, intan IBF title hi a hlu tih ka hria a, September 21-a inhnek tur atana ka thilpek che u ni rawh se," tiin social media lamah a tarlang.

Kum 37 mi Usyk hian a title hi a ui ve tho a, December 21-a Fury nen an inhnek nawn hunah kawnghren pali an inchuh leh theih vek a duh. Mahse, IBF danah Usyk hian IBF mandatory challenger a tum a ngai a, a tum tak lohah chuan hlihsak a ni ta zawk a ni.

Usyk hmaa last undisputed heavyweight champion hnuhnung ber chu Lennox Lewis kha a ni a, mahse, British boxer record erawh three-belt hun lai a ni a, kum 2007 khan WBO title hi official taka pawm a ni ve chauh.