Khalid-a'n Jamshedpur enkawl chhunzawm dawn

Aizawl FC coach hlui Khalid Jamil chuan Indian Super League club Jamshedpur FC-ah contract thar a ziak a, Men of Steel hi season hnih dang a kaihruai leh ang.

Jamshedpur hian season hman zawh tak kha Scott Cooper hoin bul an ṭan a, mahse, English coach kaihhruaina hnuaia an match hmasa 11-ah vawi hnih chiah chakin, an inṭhen a, season tawp thleng atan Khalid an la lut zui.

I League vanglaia Aizawl FC champion puitu Khalid hian league match 10 kaihruaiin, vawi thum chakin, vawi thum draw an nei a, vawi li an tlawm - Super Cup-ah semifinal a hruai thleng bawk a, a record a chhe lo.

Khalid chuan, "Ka hlim em em a, ka lawm em em bawk. ISL nomawi chawi kan duh a, kan fan-ten min thlawp ṭhat ṭhin em avangin a phu pawh an phu a ni," a ti.

Kum 47 mi Khalid hian 2016-17 season khan, I League leh ISL la kal kawp laiin Aizawl FC chu I League-ah a champion pui a, Indian football chanchina Indian coach hlawh hnem ber ni turin East Bengal a zawm zui.

East Bengal hnuah hian Mohun Bagan enkawl lehin, June 2019 khan ISL club NorthEast United chu Assistant Coach-in a zawm a, hemi ṭum hian season tawp lamah coach lailawk hna an chelhtir.

2020-21 season khan coach lailawk niin Highlander a kaihruai leh a, ISL playoff a vawi khat nan a hruai thleng. A hnuah coach nghet ni turin contract a ziak a, ISL-a Indian coach nghet hmasa ber a ni.

Mahse, Highlander chhuah-san lehin, Bengaluru United a zawm a, September 2023 khan Nepal Super League club Chitwan enkawl turin inremna nei mah se, a enkawl leh lo a, December 2023 khan Jamshedpur hi a zawm a ni.