World champion Argentina an chak nawn: Quarterfinal khel turin an inpet tling nghal

Copa America 2024 khelh laiah Argentina chu quarterfinal lut hmasa ber an ni - champion lai hian nimin zing khan Lautaro Martinez-a goal khat hmangin Chile chu 1-0 in an hneh.

Lionel Messi hoa khel Argentina hian an match hmasa zawkah Canada an hneh tawh bawk a, match vawi hnih an khelh tawhah Group A hmahruaitu niin knockout stage an lut fel tawh - June 30 zingah Peru nen an inkhel leh dawn a, an indahṭha thei tawh ang.

Nimin zinga Group A inkhel dangah Canada chuan Peru lakah 1-0 in hnehna an chang, goal awmchhun hi Lille striker Jonathan David khung niin quarterfinal lut thei turin an dinhmun an siamṭha ve leh bawk - Chile nen an la inhmachhawn ve leh dawn a ni.

Goal khat a lut

MetLife Stadium-a inkhelah Argentina lamin ball chang tamin inkhel an thunun hneh hle a, mahse goal khung an harsat. Messi kianga khel Julian Alvarez leh Fiorentina midfielder Nicolas Gonzalez ten remchang nei mah se an chhawr thei lo.

Chile player-ten Messi an veng uluk a, hmun awl an pe duh miah lo. Argentina captain hliam box pawn hla deuh taka a ball chan chu goal lamah a pet thut a, goalpeeker Claudio Bravo-a'n dang phak lo mah se goal ban a per hlauh.

Liverpool midfielder Alexis Mac Allister pawhin remchang ṭha lutuk a nei, amaherawhchu Bravoa-a'n lo tawk pial hmanin goal ban a per a, vannei takin Chile an him hram hram zel a, an him tlang mai dawn ni pawhin a lang hman.

Minute 72-naah Chile an rawn inlar thut - Rodrigo Echeverria chuan hlauhawm tak maia chein goal a khung dawn ni pawhin a lang hman, mahse goalkeeper Emiliano Martinez chuan a lo dang hram ve thung a ni.

Bench aṭangin Angel di Maria leh Martinez te an lut a, Inter Milan striker Martinez bawk hi danglamna a ni. Corner aṭanga ball kal chu Chile lamin an tauh chhuak thei mai lo a, changtu nei lo Martinez-a'n hnai tak aṭangin goal awmchhun a khung.

Messi dinhmun

Chawlhlawk hman hmain Messi chu a malpui hliam enkawl lailawk a ngai a, inkhel chhunzawm lehin hun tawp thleng a inlan thei. Hliam na tak ni lo mah se dam ṭha pangngai tak a ni lo tih erawh a hriat theih thung.

Messi chuan, "Khawsik leh hritlangin min tibuai ve reng a, chutiang kara inkhel ka nih avang chuan ka taksa a nghawng ve ni pawhin ka hria. Tun hma lama ka hliam neih tawh kha chu a ni lo, ka hriat dan chuan tihrawl chauh niah ka ngai.

"Inkhel tir lamah khan ka malpui vei lam kha a nuam lo deuh a, chutiang chunga match ka khel tluan thei kha ka lawm, tunah chuan engtin zel nge a awm tih kan ngaichang rih ang," tiin a sawi a, chawlh rei a ngai lo tura a beisei thu a sawi bawk.

Kum 37 mi Messi hi Argentina tan player a ni satliah lo a, khelmual chhung leh pawn lama an hruaitu pawimawh a ni, hliam vanga a chawlh a ngai a nih chuan chânna lian tak a ni thei dawn a, a hmun ruak hnawhkhah a harsa ang.

Chutihrualin, coach Lionel Scaloni tan player thlan tur erawh an tam - tlarhmaah Angil di Maria a awm thei a, season liam ta Serie A goal khung tam ber leh champion puitu ni bawk Martinez bakah Manchester City duhlai Alvarez an la nei; Alejandro Garnacho a la awm bawk.

Uruguay inlan hun

Zirtawpni zing dar 6:30-ah inkhel hmuhnawm a awm leh dawn, world champion ni hmasa ber Uruguay chuan Bolivia an hmachhawn ang. Marcelo Bielsa naute hi an chak leh a nih chuan quarterfinal an lut chiang thei dawn a ni.

Uruguay hian an match hmasa zawkah Panama chu 3-1 in an hneh. Liverpool striker darwin Nunez chu tlarhmaah a hmuhnawm a, goal a khung bakah Panama tlarhnung tan harsatna a siam hnem, tun ṭumah pawh en bik a hlawh leh ang.

Nunez chawm turin Federico Valverde an nei, ani hian mual lai aṭangin inkhel a khaikhawm ṭhin. Real Madrid midfielder chungchang sawiin Bielsa chuan, "Inkhel boruak thlang danglam theitu a ni a, ani hnenah chuan game kalhmang ka duh ang chu ka hrilh mai ṭhin.

"Football hi a hre ril em em a, kan team chauh ni loin kan khingpui chet dan zawng zawng pawh hi a lo zirchiang hman hle ṭhin," tiin a dahsang hle a, club lama tawnhriat nei ṭha a nihna chu Uruguay pawhin nasa takin an chhawr.

Inelna thlengtu USA pawhin Panama an hmachhawn dawn a, forward ṭha Christian Pulisic hoa Bolivia hneh theitu an nih avangin inrintawkna an nei sang dawn a, fans an neih ṭhat bawk avangin thleng sang turin an tan kawng a inhawng zau hlea ngaih a ni.