Real Madrid captain Nacho a chhuak

Nacho chuan kum 23 chhung a chamchilh tawh Real Madrid a chhuahsan dawn - Spanish club lian tan hian nomawi 26 a chawi a, heng zingah hian Champions League paruk a tel.

Spanish defender hian kum 10 mi lek a nih laiin Real Madrid youth academy a zawm a, kum 2012 khan senior match hmasa ber khelin a club tan hian inelna hrang hrangah match 364 a khelhsak hman a ni.

Tun thlatir khan Real Madrid tana a match hnuhnung ber ni turin Champions League final a khel a, nomawi inchuhna inkhelah hian Borussia Dortmund chu 2-0 in an hneh.

Real Madrid player zingah mi pangain Champions League nomawi paruk an la thei a, chung zinga pakhat chu Nacho hi a ni. A sulhnu a ṭha a, hriatreng hlawh kumkhua tawh tur a ni ang.

Nacho kalna tur hi a la chiang chiah lo a, chutihrualin khawthlang chanchinbu mite chuan Saudi Arabian club Al-Qadsiah a zawm dawn niin an sawi a, thuchiang erawh a la awm rih lo.

Kum 34 mi Nacho chuan, "Ka sulhnu leh hun liam tawh hnu thlir kir hun a ni a, hmanhmawh lo leh muangchanga thutlukna siam hun a ni, thil chiang pakhat erawh chu kei leh ka chhungkuain nun thar leh chona thar hmachhawn hun a ni," a ti.

Nacho hian UCL title paruk bakah - La Liga pali, Spanish Cup pahnih, Club World Cup panga, European Super Cup pali leh Spanish Super Cup panga a lak pui hman.

Real Madrid president Florentino Perez chuan, "Nacho hian kum naupangtê ni chungin Real Madrid academy a rawn zawm a, a nungchang leh khelmual chhunga a chet danah midang tan entawn tlak a ni.

"Midang a zah thiam a, hotu ṭha a ni bawk. Midangin an ngaina em em a, an zah bawk - ani ang kan nei thei leh kan hnena hun a hmang thei kha a lawmawm," tiin Nacho a thlah a, duhsakna a hlan zui bawk.