Young tan contract thar

Ashley Young chuan Everton tan season khat daih contarct a ziak thar a, kum 38 mi ni tawh mah se season tharah Premier League a la khel dawn tihna a ni.

Nikum nipui bazar lai khan Young hian Everton hi a zawm, inelna hrang hrangah match 34 khelhsakin a team hi point paihsak an ni chungin English football inelna sang berah 15-na a nihpui.

Thla thara kum 39 ni mai tawh tur Young chuan, "Contract thar ziak turin ka tan inngaihtuah buai a ngai lo, season hmasa khan club hian hun harsa tawng mah ila club hi a nuam ka ti a, hun ka hmang chhunzawm thei tur hi ka lawm," a ti.

Young hian kum 21 chhung chu professional football a khel tawh, hetih hun chhung hian Manchester United, Villa leh Inter Milan tan khelin - Premier League, Serie A, FA Cup leh Europa League te a lakpui tawh.

Everton hian tun thlatir khan an captain Seamus Coleman chu kum khat atan inremna an lo ziahpui tawh a, nipui bazar inhawn chhung hian Marseille forward Iliman Ndiaye chu lakluh ngei an tum bawk, inbiakna pawh tluang takin thui tak a kal tawh a ni.