Pro division club thar Sihphir

Mizoram Volleyball Assocaiton (MVA) chuan Pro Division a awm turin Shihphir Volleyball Club te a hlang kai, vawiin khan MVA hi ṭhukhawmin thutlukna hi an siam a ni.

Tun hnai khan Pro Volleyball League (PVL) champion lai Hunthar chuan season tharah Pro Division club an nih chhunzawm theih loh tur thu an sawi a, hei vang hian tualchhung volleyball inelna sang bera awm tur hmun ruak pakhat a awm.

MVA chuan thuchhuah siamin, "Hunthar VC te Pro Division aṭanga an inhnuhdawh avangin, an hmun ruak luahkhattu tur hi MVA chuan ngun taka a ngaihtuah hnuah, Pro Division atana playoff neiha pahnihna Sihphir Volleyball Club te chu an dah a ni," an ti.

Sihphir Volleyball Club hi volleyball club hlun tak niin kum 1991 a din a ni. MVA-in Aizawl District Volleyball Association a siam hmain MVA Club nung tak ni ṭhin an ni a, kum 2023- 24 Season khan ADVA Season Opening Tournament Champion niin, Season Ending Tournament-ah semifinal an lut bawk.