Brazil chakna Neymar-a hattrick Goal 64 khungin Ronaldo a khum

Neymar chu Brazil tana goal khung hnem pahnihna a ni ta, a chungah hian legend Pele chauh a awm tawh. Nimin zing South America World Cup qualifier inkhelah Neymar hian hattrick siamin an ram hi Peru lakah 4-2 in hnehna a chanpui.

Paris St Germain forward hian ram tan match 103 a khelh aṭangin goal 64 a khung thei a, striker ropui Ronaldo (62 goals) a khum - goal 77 khungtu Pepe erawh a la hlat deuh a, chutih rualin kum 28 mi chauh ala nih avangin 'King of Football' an tih meuh pawh a khum theih a rinawm.

Nimin zing Estadio Nacional del Peru a inkhelah winger Andre Carrillo chuan minute rukna lekah goal hmahruai a khung a, chawlhlawk hmain Neymar chuan penalty aṭangin siphurh a sut a, 1-1 in chawlhlawk an hmang.

Peru bawkin hma an hruai nawn, minute 59-naah Renato Tapias-a'n hla deuh tak aṭangin an goal hnihna a khung, mahse Everton forward Richarlison hmangin Brazil lamin an sut leh a, hun tawp dawn thleng team pahnih an in bei tawk viau.

Mahse, minute 80 hnu lamah Peru an buai, defender Carlos Zambrano-a'n Neymar a tih tluk vangin penalty a chawi a, a hlawh chhuaktu hian a khung - Zambrano bawkin Richarlison a nghawk avangin hnawhchhuah zui a ni.

Peru lamin point hlawh chhuah an tum luatah an ṭangulh a, keeper Carlos Caseda chu bench-ah awm mah se a chet mawi loh avangin red card pek a ngai hial, hun tawp hma chiahin Neymar bawkin a lungthu kim nan goal an khung.

Brazil tana goal khung hnem ber Pele-a'n ram tan match 92 aṭangin goal 77 a khung a, Ronaldo khan match 98 aṭangin goal 62 a khung thung - Neymar erawhin match 103 a khel tawh a, a la khelh belh bawk ang.

Neymar theihna leh thiamna san zia sawi nep theih a ni lo, chutih rualin Pele hian an ram hi World Cup vawi thum a lakpui thei a, striker Ronaldo-a'n vawi hnih lak puiin ṭum khat chu pahnihna an ni thung - an hlawh tlin theih nana tha thawhtu pawimawi a ni.

Kum 28 mi Neymar hian player ropuite hi goal khung hnem lamah a tluk ngei a rinawm a, chutih rualin an sulhnu leh hlawhtlinna ang neih pui tur chuan hmabak a la ngah - World Cup a chawi thei a nih erawh chuan a buk a rit zual ngei ang.

Brazil hian November 12 hian Venezuela an mikhual leh dawn a, an hmachhawn leh tur team hi match hnih khelh tawha chak la nei lo an ni. Goal li ngawt chhuah an nih bawk avangin Neymar tan goal khung belh theihna hun ṭha a ni dawn.