Copa America Uruguay tan Suarez a inlan a beiseiawm

South America chauh pawh ni lo khawvel huap pawha team ṭha tling phak tur Uruguay chu Copa Ame-rica Centenario-a an match hmasa berah Mexico lakah an mualpho. Zirtawpni zing dar 5:00 hian Lincoln Finan-cial Field-ah Venezuela an hmachhawn leh dawn a, chak loh nawn a thiang tawh lo ang.

Uruguay hian Mexico an hneh loh ṭum hian Luis Suarez a tel lo. Barcelona forward hi May 22-a Sevilla nen Copa del Rey final an khelh ṭumin a malpui a ti na a, Thawhlehni khan team training a zawm leh tawh avangin Venezuela hmachhawn thei tura beisei a ni. Tun season liam taa Catalan club tan inelna hrang hranga goal 59 zet khungtu hi a inkhel thei a nih chuan thlamuanpui tham a ni.

Hetihlai hian Venezuela hi Suarez vanga zam chhe mai tur an ni bik lo a, an group match hmasa berah Jamaica 1-0 in an hneh tawh a, World Cup qualifying-ah pawh Uruguay nen hian 1-1 in an lo inhnehtawk tawh. Hemi ṭum hian Suarez bakah Edinson Cavani, Egidio Arevalo Rio leh Diego Godin te an inlan kim nghe nghe.

Uruguay midfielder Alvaro Gonzalez chuan, "Suarez hliam a dam tawh hian minti hlim tlang hle a, a taksa a thunun thei tawhin hmalam a pan mek. Ani ho hian kan inlan thei a nih chuan player dangte pawhin inrintawkna kan neih belh theih ngei ka beisei," tiin a sawi.

Zirtawpni zing dar 7:30 hian Group C team dang Mexico leh Jamiaca te Rose Bowl, Pasadena, California-ah an inhmachhawn ve dawn bawk a, Mexico hian hnehna an chang leh thei a nih chuan knockout round lut turin an dinhmun a ṭhat tawh dawn laiin Jamaica tan erawh point hmuh ngei a ṭul tawh thung.

Mexico hi coach Juan Carlos Osorio kahhruaina hnuaiah an khel ṭha tluang hle a, an match hnuhnung pariatah hnehna chang vekin goal khat chiah an chhuah a, an khingpuite lamah goal 17 zet an khung thung.