Mourinho lakluh hmasak ber tur Bailly?

Manchester United chuan Villar-real central defender Eric Bailly an la lut hnai a, Ivorian defender hian tunkar chhoah medical test a nei ang.

Kum 22-a upa Bailly la lut tur hian Red Devils-in pound maktaduai 30 bawr vel an sen a ṭul dawn a, player leh United te hian inremna an nei tawh nia hriat a ni.

Bailly hi Espanyol youth system chhuak niin January 2015 khan pound maktaduai 4.4-in Villarreal a zawm a, hemi hnu lawk hian Africa Cup of Nations-ah Ivory Coast champion puiin match zawng zawngah a inlan vek.

Ivorian defender hian season thum chhungin Espanyol leh Villarreal tan match 46 chiah a la inlan a, season liam ta khan league bikah match 25 a khel bawk. A tawnhriat neih dan chhutin United defender rinrawl a nih nghal a rinawm loh a, chutihrualin a man a phu lo tih nghal ngawt thei a ni lo. Bailly hi Villarreal-in season thara Champions League an khelh theihna kawngah player pawimawh a ni a, 6 ft 1.5 inches a sang defender hi a naupan bakah tharum a ngah avangin hmabak a nei êng hle.