Euro 2016 khel tur ram 24-te thil tawn danglam chu!

9th June, 2016

Europe khawmualpuia football thiam ram 24 te inelna tur UEFA Euro 2016 chu Zirtawpni zan dar 12:30 hian Stade de France-ah inelna thlengtu France leh Romania ten match hmasa ber an khel ṭan tawh dawn.

Tunhma chuan Euro-ah hian ram 16 an inel ṭhin a, kumin aṭang hian ram 24-a tih pun niin inelnaa inlan tur ramte hian football-ah hnuhma danglam leh lang sar tak tak an lo nei tawh hlawm. Sulhnu ṭhenkhatte chu hriat reng tawh tura hlu leh ṭha a nih rualin ṭhenkhat erawh hunin a liampui hlan a nghahhlehawm hle ta ve ang.

FIFA ranking chhuak thar bera pahnihna Belgium leh 42-na Albania te inlanna tur a nih avangin team inthlau leh dinhmun inang lo tak tak an ni dawn tih a chiang a, he inelna lian khel thei tura an inhlankai dan kawng leh an thil tawn pawh a inang lo hlawm hle.

Belgium - (FIFA ranking 2)

Euro khel tur zinga FIFA ranking-a sang ber Belgium hian qualifying-ah goal 24 khungin Group B-ah hmahruaitu an ni a, an striker Christian Benteke, Divock Origi, Michy Batshuayi leh Laurent Depoitre ten goal khat ṭheuh an khung laiin Chelsea leh Manchester City midfielder Eden Hazard leh Kevin de Bruyne te chuan goal nga ve ve an khung thung.

Germany - (FIFA ranking 4)

World champion Germany hi an kulhpui Philipp Lahm-a'n Brazil-a hlawhtlinna a chanpui hnuah ram tana inkhelh a chawlh san a, an hotupa tel lo hian eng nge an thlen dawn tih hriat a châkawm tawh. Group D-ah hmahruaitu an ni a, midfielder Toni Kroos chuan qualifying-ah German player mai ni lo ramdang player zinga amah hnaih bertu aiin vawi 315 in a pass tam zawk.

Spain - (FIFA ranking 6)

Player ṭha awm khawmna Spain hian World Cup emaw Euro qualifiers-ah emawh hneh loh an tawng khat hle a, a zawnin match 36 zet an tlawm lo. Mahse, kum 2014 October khan Slovakia an hneh lo! Amaherawhchu, Vicente del Bosque naute an in thing harh chiang hle a, a zawna match riat ngawt goal chuah loin hnehna an chang zawn a, an ram record thar an siam hial.

Portugal - (FIFA ranking 8)

France-ah hian Portugal captain Cristiano Ronaldo-a'n goal a khung a nih chuan European Championship vawi lia goal khung thei vek hmasa ber a ni dawn. Hei mai bakah hian Real Madrid forward hian European Championship-ah goal ruk khung tawhin goal khung hnem ber Michel Platini (9) record tluk theihna hun a nei dawn a ni.

Austria - (FIFA ranking 10)

Hmasawnna a zuan in a zuang - hei hi Austria ram football chanchin a ni. FIFA ranking-ah Austria hi tun hmain 105-na hnuai lam an ni ṭhin. Kum 2008 khan Switzerland nen Euro an inthlen ṭawm a, European Championship-a an inlan hmasak ber ṭum leh awmchhun a la ni. Kumin Euro qualifier match 10 an khelhah an tlawm miah lo a, tunah chuan FIFA ranking-ah 10-naah an awm ta.

England - (FIFA ranking 11)

FIFA World Cup champion tawh zinga European Championship nomawi la chawi lo awmchhun chu England chiah hi an ni. Euro 2016 qualifier-ah chak loh an nei miah lo a, tun hma aṭang tawhin ram paruk chiahin European Championship qualifier-ah hian hnehna an chang tluan vek thei. Kuminah hian an player-te kum chawhrual hi kum 25 leh ni 308 a ni a, chawh ruala squad nei naupang ber an ni.

Italy - (FIFA ranking 12)

Tun hma aṭang tawhin Italy hi an tharhmate goal khung aia an tlarhnung phui ṭha hi an dinchanna chhan a ni ṭhin. Euro 2012 final-ah Italy hi Spain lakah 4-0 in an tlawm a, he inhnehna hi European Championship emaw World Cup emaw pawh ni se hei aia final-a insawp nasatna hi a awm lo.

Switzerland - (FIFA ranking 15)

Switzerland hian European Championship an khelh hnuhnung kum 1996, 2004 leh 2008-ah te khan group stage an paltlang zo lo vek a ni satliah mai lo a, a hniam ber an ni vek. Inelnaah hian match kua khel ve tawhin vawi khat chiah hnehna an la chang a, goal nga khung ve tawhin goal 13 zet an chhuah thung.

France - (FIFA ranking 17)

A thlengtu an nih vangin France hian qualifying an khelh a ngai lo a, mahse an mahni khelmual leh khualmualah friendly match an khel thung. Inkhel an hmachhawn aṭanga tehin France hi qualifier pawh khel se Group hmahruaitu ni thei tur khawpin an khel ṭha. Kuminah hian an striker rinrawl ni tura ngaih Karim Benzema chu khelmual pawn lama buaina a neih avangin an ko ve lo.

Turkey - (FIFA ranking 18)

Football-ah chuan ngaiawh a awm theih loh a ni ber a - hma sawn lo chu an hnungtawlh zel. Turkey hian European an khelh ve tawhah hma an sawn zel. Kum 1966 khan group stage an paltlang lo a, kum 2000 khan quarterfinal thlengin kum 2008 kha chuan semifinal an thleng hial. Kuminah hian final thleng thei tak maw?

Ukraine (FIFA ranking 19)

Khawvel huapa player langsar leh ṭha kawl khawm ruih lo mah se Ukraine hi team chhia an ni ngai meuh bik lo a, mahse an vannei tawk lo. World Cup playoff-ah vawi li ngawt an chak lo tawh a, Euro playoff-ah vawi khat an chak lo tawh bawk. Kuminah playoff hmachhawn lehin Slovenia 3-1 in an hneh thung.

Hungary - (FIFA ranking 20)

Euro khel thei upa ber chu Lothar Matthaus a ni. Germany player hian kum 39 leh ni 91-a upa ni chungin Euro 2000 kha a khel. Kuminah hian Hungary first choice goalkeeper kum 40-a upa Gabor Kiraly hi a inkhel thei a nih chuan he inelnaa inlan thei upa ber a ni dawn. Kiraly aia ni 19 chauha upa Republic of Ireland Shay Given pawhin record siam theihna hun a nei dawn a ni.

Romania - (FIFA ranking 22)

Euro-ah Romania hian match 13 an khel tawh aṭangin vawi khat chiah hnehna an la chang! Mahse, an chak chhun hian nghawng a nei lian thung. Euro 2000 khan hun tawp dawna penalty an khung hmangin England an hneh a, last 16 an inpet kai. English striker ropui berte zinga mi Alan Shearer-a European Championship tawpna chu first round a ni.

Slovakia - (FIFA ranking 24)

Slovakia midfielder Vladimir Weiss hi Manchester City-a intuai hriam tawh a ni a, tunah hian Qatar Stars League-ah Al-Gharafa tan a khel mek. Qualifying-ah khan a ṭhiante goal khung tur vawi ruak siam sakin Arkadiusz Milik (Poland) leh Eran Zahavi (Israel) te nen record nei ṭha ber an ni.

Northern Ireland - (FIFA ranking 25)

Northern Ireland hi qualifier Group F-ah awmin seeded pangana an ni a, France-a inkhel tura an kal theih hi khawvelin a beisei lo. Mahse, Northern Ireland hian match 10 an khelh aṭanga point 21 hmuin a chung berah an awm. European Championship khel tur zingah seeded pangana ni chunga bul ṭan group hmahruaitu ni thei hmasa ber an ni. A zawnin match 12 chhung zet hneh loh an tawng lo a, tlawm loa kal tluang rei ber an ni hial!

Wales (FIFA ranking 26)

Wales-in European Championship an khelh theih nana an goal khung zawng zawng zinga 64% zet chu khawvela player man to ber Gareth Bale-a khung a ni. Euro 2016 khel tur ram player zingah Real Madrid player aia ram pakhat tana thawh hlawk an awm lo.

Croatia - (FIFA ranking 27)

Kum 1991-a Yugoslavia aṭanga an indan hnuah Croatia hian Euro qualifier hi vawi ruk an khel tawh a, vawi khat chiah tlin loh an nei. European Championship an khelh hmasa kum 1996 leh 2008 khan quarterfinal an lo lut tawh nghe nghe.

Poland - (FIFA ranking 27)

Euro 2016 qualifier-ah khan Robert Lewandowski chuan goal 13 khungin ani aia khung tam an awm lo. Bayern Munich striker hnungah hian goal 11 khungtu Zlatan Ibrahimovic a awm. Poland hian Euro 2016 inpet kai tur hian goal 33 zet khungin eng ram mahnin an goal khung zat hi an khung ve lo.

Russia - (FIFA ranking 29)

Euro khel tur zingah Russia chiah hi qualifier-a lu (head) hmanga goal khung lo awmchhun an ni. Russia goal khung 18 te chu an ke hmanga a lut vek a ni a, Montenegro nen an inhmachhawn ṭumin buaina a chhuah avangin 3-0 a chak zawk a puan an nih avangin an goal kung zat hi 21-a chhut sak an ni.

Czech Republic - (FIFA ranking 30)

Czech Republic hian qualifier match 10 an khelh aṭangin goal 21 khungin goal 12 an chhuah a, anni ram chauh hi an inkhelh zawng zawnga goal chhuah kim vek an ni. Group stage paltlang tur chuan an tlarhnung an remkhawm fuh a ngai hle ang tih a chiang.

Republic of Ireland - (FIFA ranking 33)

Upat hi finna a nih chuan Republic of Ireland hi Euro 2016 khel tur ram zinga fing ber an ni ang. An player-te kum chawlhrual hi kum 29 leh ni 297 a ni a, squad upa ber an ni. Ram tana vawi 100 khel tling tawh player Robbie Keane (143), Shay Given (134) leh John O'Shea (111) te an kawl. Season liam taa Stoke tana match nga kheltu Given hian an match hmasa berah Sweden a hmachhawn a nih chuan European Championship khel thei upa ber a ni dawn a, mah se Hungary keeper Gabor Kiraly-a'n a rawn khum ngei tura ngaih a ni thung.

Iceland - (FIFA ranking 34)

Hmangaih hmasa ber hi a theihngilh theih loh a nih chuan Iceland hian an vawi khat inlanna tur kumin Euro 2016 hi an theihnghilh leh tawh ngai lo ang. Mipui 330,000 chauh awmna ram hi European Championship emaw World Cup emawa inlan thei ram te ber an ni.

Sweden - (FIFA ranking 35)

Striker induhtawk ve tak Zlatan Ibrahimovic hian 'kan ram chu Euro 2016 khel turin ka hruai thleng' ti se mi mak tih a hlawh mai thei. Mahse, a hnathawh an chhut erawh chuan an dem lo ang. Manchester United nena an sawi zawm mek Ibra hian qualifying-a Sweden goal khung 19 zinga 11 zet chu a khung a ni a, amah hnaih bertu Erkan Zengin chuan goal thum chauh a khung.

Albania - (FIFA ranking 42)

Football-ah chuan eng result pawh a thleng thei - tiin mi tam takin sawi ṭhin mah se Albania hian Euro nomawi an chawi a rinawm chuang loh. Albania hian qualifying-ah an khingpuite goal zawnah vawi 28 chiah an pet a, France pantu ram zingah hmatawng bil bera ngaih an ni. Qualifying khel zingah anni ang thoa hmatawng hriam lo chu Gibraltar niin point an hmu lo thung a, anni hi Group D mawngphaha awmin an goal difference chu -54 a ni!