Copa America Centenario Quarterfinal-ah Colombia; US an chak nuamsa

Nimin zing khan Colombia chuan 2-1 in Paraguay an hneh a, Copa America khelh mekah quarterfinal an lut ta. Inelna thlengtu USA chuan an match hmasa bera Colombia an hneh loh hnuin Costa Rica 4-0 in an sawp a, quarterfinal luh beiseina an la neih chhunzawm ve zel bawk.

Colombia tan James

Copa America-a an match hmasa bera USA hnehtu Colom-bia-in Group A inkhel dang-ah USA-in Costa Rica an hneh tih hre chungin Paraguay an hmachhawn a, an chak chuan quarterfinal an lut thei dawn tih an hria.

Inkhel ṭan a nih aṭangin Colombia-in an nawr na nghal a, minute 12-naah Carlos Bacca hmangin goal hmahruai an khung. Colombia coach Jose Pekerman-a'n hliam nei chunga a chhawr luih James Rodriguez-a'n coach rinna chhangletin minute 30-naah Colombia goal hnihna a khung.

Paraguay-in second half-ah an beiseina chhi nung turin substitute Victor Ayala hmangin minute 71-naah goal khat khung ve mah se minute riat a liam hman chauh tihin Oscar Romero chuan a yellow card pahnihna hmuin hnawhchhuah a ni a, Paraguay tan thawh leh ngaihna a awm tawh lo.

Dempsey a langsar

USA-in Costa Rica an sawpna inkhela player langsar ber chu Clint Dempsey a ni. Kum 33-a upa winger hian minute 9-na lekah US tan penalty aṭangin goal hmahruai a khung a, ram tan vawi 125 a inlana a goal 50-na chiah niin an inkhelhna Soldier Field hi ram tana goal a khung hmasak berna stadium tho a ni.

Tottenham Hotspur winger hlui hian goal hmahruai a khung bakah hian Jermaine Jones leh Bobby Wood-te goal khung tur a siam sak ve ve bawk a, substitute Graham Zusi chuan US tan goal khat a thawh ve bawk.

United States coach Jurgen Klinsmann chuan, "Quarterfinal lut tur chuan keimahni bawk hi kan pawimawh. Goal hmasa ber kan khung hnuah kan phur sawt a, goal dang khung tumin kan thawkrim hle a ni," tiin an goal khung hma chu an ṭhatpui thu a sawi.

Germany striker ropui ṭhin chuan hmasawnna tur an la ngah thu sawi nghalin, "Argentina leh Chile inkhel en khan an tlan chak em em a, ball an thiam tho bawk si. Keini chuan zir tur kan la ngah a ni. Argentina bench a-
ṭanga player tlan lut ho kha i en chuan i awih lo hial zawk ang," tiin Copa America-a sang tak thlen a har tur thu a sawi chhuak.

Dinhmun

Copa America khelh mek group A-ah Colombia, United States, Paraguay leh Costa Rica an awm a, inkhel vawi hniha chak tawh Colombia chuan quarterfinal an lut tawh. United States hi pahnihna dinhmunah awm mekin an hnuaia awm Paraguay leh Costa Rica-ten point khat ve ve hmu tawhin beisei an la nei cheu.

USA-in quarter final lut turin June 12 zinga Paraguay nen an inkhelh hunah chak an mamawh dawn a, team pahnih result hian June 12 zing veka Colombia hmachhawn tur Costa Rica dinhmun a hril thui hle ang.