Everton boss thar Ronald Koeman

Premier League club Everton chuan season thar aṭanga an manager ni turin an elpui Southampton boss Ronald Koeman an la lut dawn a, Dutch manager lak-luh nan hian Saints hnenah hian zângnadawmna pound maktaduai 5 an pe dawn.

Kum 53-a upa manager hian Zirtawpniah chuan contract a ziah fel hman bei-sei a ni. A contract rei zawng tur hi tarlan ni lo mah se Koeman hian Merseyside club-ah hian kum khatah pound maktaduai 6 a hlawh dawn nia tarlan niin Roberto Martinez hmunruak a luah ang.

Vitesse Arnhem, Ajax, Benfica, PSV, Valencia, AZ Alkmaar leh Feyenoord te pawh lo enkawl tawhtu manager hian a unaupa Erwin Koeman leh fitness coach Jan Kluitenberg-te chu Goodison Park-ah hian a hruai tel ang.

Player a nih laia Ajax, PSV Eindhoven leh Bar-celona tan pawha lo khel tawh defender hian manager a nih hnuah Ajax leh PSV chu league-ah nomawi a lo chawipui tawh a, Valencia chu Spanish Cup-ah a champion pui tawh bawk.

Defender nichunga player a nih laia match 763 khela goal 253 lai khung thei Barcelona legend hian Southampton-a kum hnih a cham chhungin pasarihna leh parukna dinhmun a luahpui a, Saints-in Premier League chanchinah hei aia sang an tawng ngai lo.