Totti-a'n contract a pawt sei

Kum 39-a upa, Roma legend Francesco Totti chuan kum khat dang cham chhunzawm leh turin contract thar a ziak a, season thar lo awm tur tawp hunah inkhelh a chawlhsan a nih chuan an khaw club tan hian a football nun zawng zawng a hlan zo vek dawn tihna a ni.

Roma coach Luciano Spalletti-a'n a chhawr mumal vak loh avangin Totti dinhmun hi a nghing ve deuha sawi a ni a, mahse match 758 a khelh aṭanga goal 304 a khung sak tawh a club hmangaih hi a chhuahsan thei lo.

Roma club chanchina match khel tam ber leh goal khung hnem ber ni bawk Totti hian season hmasa khan Serie A match 13 chiah a khel a, mahse an match hnuhnung paruk aṭangin goal li a khung thei.

Contract a ziah vanga a lawmthu sawiin Totti chuan, "Contract thar ziah hi ka duhthusam a ni a, club pakhat tan chauha khel chunga inkhelh chawlhsan hi ka lo suangtuah tawh ṭhin chu a ni," tiin a sawi.

Kum 1989 khan Totti hian kum 12 chauha upa ni chungin Roma hi a zawm a, kum 1993 khan kum 16 leka upa ni chungin senior team tan a khel ṭan. Serie A-a captain ni thei naupang ber dinhmun luah chhoin kum 2001 khan league-ah a champion pui hial.

Club president Jim Pallotta chuan, "Roma tan contract a pawt sei hi kan lawm a, he club tana a season hnuhnung ber hi kan insiam ṭhat bulṭanna kum a lo nih theih ngei ka beisei," tiin a player ropui chuan a hun hnuhnungah hnuhma ropui a hnutchhiah belh theih nan intuai thar an tum thu a sawi.