Saina chak mah se Sindhu chak lo

Australian Open Super Series badminton tournament-ah Indian shuttler Saina Nehwal chuan a match hmasa berah hnehna chang mah se P V Sindhu erawh a chak lo nghal thung.

Nimin khan Saina hian Australian nula Joy Lai chu minute 29 chhung lekin 21-10, 21-14 in a hneh. Seeded pasarihna Saina hian second round-ah Jin Wei Goh a hmachhawn leh ang.

World number 10 Sindhu chuan beiseina sang tak nen tournament hmachhawn mah se South Korea shuttler Kim Hyo Min lakah minute 55 chhungin 15-21, 19-21 in a tlawm.

Mipa lamah Kidambi Srikanth leh Sameer Verma ten hnehna an chang ve bawk a, seeded 12-na Srikanth chuan world number 11 Ka Long Angus lakah minute 32 chhungin 21-16, 21-12 in hnehna a chang. Sameer chuan Maulana Mustofa chu 22-20, 15-21, 21-15 in a hneh ve bawk.