Georgia lakah Spain an mualpho

European champion Spain chuan Euro 2016 inpuahchahna atana an match hnuhnung berah Georgia 1-0 in an hneh lo. Thawhlehni zana Coliseum Alfonso Perez stadium-a inkhela goal awmchhun hi minute 39-naa Georgia midfielder Tornike Okriashvili khung a ni a, March 2015 hnua a vawi khat nan Spain an chak lo.

Vicente del Bosque-a'n FIFA ranking-a 137-na ni phak ṭawk Georgia an hmachhawn ṭumin player ṭha a luhtir a, captain Iker Casillas aiah David de Gea chu khelhna hun a pe bawk.

Inkhelh ṭantirh lamah Sergio Ramos, Aritz Aduriz leh Cesc Fabregas te'n goal khung theihna chance ṭha an hlah nghal a, Thiago Alcántara -a'n goal ban a pet per bawk. An khelh dan enin Spain an chak dawn niin a lang a, Georgia tan vanneih beisei ngam chi a ni lo.

Amaherawhchu minute 39-naah Jordi Alba ball pass chu Sergio Ramos tan a na mah mah a, Georgia-in chhut let nan hmangin Jambul Jighauri pass chu yard ruk vel leka hla aṭangin vengtu nei lo Okriashvili-a'n a pet lut.

Del Bosque-a'n Andres Iniesta, Coke, Hector Bellerin leh Mikel San Jose te luhtirin second half-ah goal beisei mah se Georgia player zawng zawngin goal venhim hna an thawh avangin goal dang an luh belh tawh lo.

Nimin khan Spain-in inelna neihna hmun tur France an pan a, an match hmasa ber chu Toulouse-ah Czech Republic nen June 13 khian an khel ang. Champion lai hi Group D-ah Czech, Turkey leh Croatia nen an awm.

Spain coach Del Bosque chuan, "Result ṭha ni lo mah se kan khel chhe lo. Awmze nei taka tlarhnung rem kan ṭhiat thei lo mai chauh a ni. Kan khingpuite goal venhim dan kha chhuanawm ka ti a, chutihrualin kan hnual phah lo. Kan hmabaka chona awm hmachhawn hi kan châk tawh a ni," tiin an hnual phah loh thu a sawi.