Jeje-a ropui zanah India-in Laos sawisa

Barcelona an chak chuan Lionel Messi-a'n goal a khung tihna a ni a, Real Madrid an chak chuan Cristiano Ronaldo hming a lang tel lo ngai lo - hei hi India rama Mizo tlangval Jeje Lalpekhlua chanchin hrilhfiah dan awlsam ber a ni!

Thawhlehni zan khan India chuan 2019 Asian Cup qualifiers final round lut turin Laos 6-1 in an sawp a, season duhawm hmangtu Jeje-a'n India tan goal hnih a khung - mipui tluklehdingawn khat aia tam awmna India rama football chanchin hi Mizo tlangval hming lam tel lo chuan a kim tawh lo.

A hming chu Jeje

India coach Stephen Constan-tine-a'n Asian Cup qualifier an khelh turah Mizo pakhat chiah a telh a, Mizo awmchhun erawh India tana player pawimawh ber tih ngam a ni.

Kar hmasa Ningani khan Vientiane-ah India leh Laos hian first leg lo khel tawhin India hi Jeje goal hmangin 1-0 in an chak.

Thawhlehni zana Indira Gandhi Athletic Stadium, Guwa-hati-a inkhelah pawh Jeje tho a langsar. Mikhual team Laos-in Khonesavanh Sihavong hmangin minute 16-na lekah goal hmahruai khung mah se India tan Jeje-a'n minute 43-naah a sut a, Sumeet Passi (45+1’) Sandesh Jhingan (48’), Mohammed Rafique (83’) leh Fulganco Cardozo (87’) ten chhunzawm ve lehin Jeje-a'n minute 74-naah a goal hnihna a khung bawk a, inkhel pahnih belh-khawmin India 7-1 in an chak.

Hnahthial tlangval hian minu-te 82-naah a hmingṭhat belhchhah turin hattrick siamna hun ṭha nei mah se a vanduai a, Mohun Bagan striker ball pet hian post a per. Indian player zingah Jeje-a bakah Manipuri winger Jackichand Singh a khel ṭha takzet a, minute 41-naa lut ve chauh winger hian a ṭhiante thun tur vawi thum a siamsak.

Chhetri ban phak loh Jeje

India rama striker ṭha bera sawi ṭhin chu Baichung Bhutia a ni. 'Sikkimese Sniper'-in inkhelh a chawlhsan hnuah a aiawh zo tur striker Indian football ngainatuten an inzawt a, a chhanna chu Sunil Chhetri a ni.

Ram tan vawi 90 inlana goal 50 khung tawh striker hian Baichung-a pheikhawk hnutchhiahah zo takin a ke a thawlh lut a, India-in footballer a neih hlawhtlin ber zingah a invawrh chho. Mahse, Bengaluru FC striker hi kum 31-a upa a ni tawh a, a aiawh tur an inzawt ṭan mek - a chhanna chu Jeje Lalpekhlua a ni.

Season hman zawh takah Sunil Chhetri-a'n inelna hrang hrangah goal 23 a khung a, Jeje-a'n goal 32 a khung thung. India captain-in Mizo tlangval goal khung zat a phak lohna hi goal kua lai a ni.

Sunil Chhetri-a'n I League-ah Bengaluru champion puiin AFC Cup-ah quarterfinal an lut a, SAFF Cup-ah India a champion pui bawk. Indian Super League-ah erawh Mumbai City chu dinhmun sangah a hruai thei lo.

Ram leh club tana inelna hrang hranga a inlan pasarihah Chhetri-a'n Asian Cup Qualifier-ah chiah goal a khung lo - AIFF Player of the Year ṭum li lai ni thei striker season hman dan hi inchhuanna tham a ni.

Mizo tlangval Jeje-a'n ISL-ah Chennaiyin FC tan nomawi a chawi hnuah I League-ah Mohun Bagan champion pui zo lo mah se Federation Cup-ah a champion-pui a, AFC Champions League Qualifier-a Indian club chak hmasa ber ni turin Mohun Bagan chu hnehna a chanpui a, AFC Cup-ah last 16 hruai thlengin India chu SAFF Cup-ah a champion pui bawk.

ISL Emerging Player of the League leh FPAI Indian Player of the Year Jeje-a'n ram leh club tana inelna hrang hranga a inlan pariatah goal a khung vek!

Federation Cup-ah bik record siamin goal riat a khung a - Fed Cup season khata goal khung hnem ber niin goal sarih lo khung tawh Baichung leh Brazilian striker Jose Ramirez Barreto-te record ropui a khum.

Tawnhriat ngah Jeje

India national team-a khel mek player zingah Lalpekhlua'n India tana khelh tam lamah player tluk loh pahnih chiah a nei - vawi 90 inlan tawh captain Sunil Chhetri leh vawi 64 inlan tawh goalkeeper Subrata Paul-te chiah an ni.

Ram tana vawi 36 inlan tawh Jeje-a hnuaiah hian Arnab Mondal a awm a, East Bengal defender hian India tan match 24 a khel tawh. Midfielder langsar Eugeneson Lyngdoh meuh pawhin India tan match 14 chiah a la khel a, Norwegian club Stabæk keeper Gurpreet Singh Sandhu pawh hian India tan match 12 bak a la khel lo.

Mizote tan

India ram football-ah player langsar ber ni tawh mah se Jeje Lalpekhlua'n a chawr chhuahna Mizoram a theihnghilh lo - Hnahthial tlangval chuan, "Pathian zarah hliam buaipui tham nei loin season ka hmang tluan thei a, ka lawm takzet a ni. India tan SAFF Cup ka chawi bakah ISL-ah Chennaiyin FC ka champion pui a, Fed Cup-ah Bagan-in nomawi kan chawi bawk. Ka season hman dan en letin a lungawithlak a, engtiklai pawha min ṭawiawm ṭhintu Mizo mipui chungah ka lawm takzet a, min ṭawiawm ṭhatna avangin hmalam ka pan zel a ni," tiin Mizo mipui chunga a lawm thu Vanglaini palai hnenah a sawi.

India tan vawi 36 a inlana goal 15 khungtu striker chuan season duhawm tak a hman chhan Vanglaini palai hrilhin, "Hlawhtlinna chang turin ka thawkrim em em a, team practice zawh hnuah pawh keimahin ka bei ṭang ṭang ṭhin a, ka finishing lamah hmasawn tumin ka bei nasa hle a ni," a ti - Mizo tlangval thusawi dikna khelmual chhungah hmuh turin a awm. Goal 32 khung chunga season khar hi striker naran tan tih chi a ni lo a, finishing nei
ṭha bik lo tan tih theih a ni lo.

MFA-in chawimawi dawn

Mizoram Football Association chuan June 11 (Inrinni) hian FPAI Indian Player of the Year ni thei Jeje lawmpuina leh chawimawina hun hi Aijal Club-ah an hmang dawn a ni.