Mohammedan elpui tur Bhawanipore

Nimin khan I League khel tur zawnna Hero I-League Qualifiers 2020 chu Salt Lake Stadium-ah khelh chhunzawm a ni a, Bhawanipore FC-in Garhwal FC 2-1 in an hneh. 

Bhawanipore hian match hnih aṭangin point ruk an hmu a, Moham-medan SC nen an point hmuh zat a inang chiah. Qualifier aṭangin team pakhat chiah an tling dawn a, Kolkata club pahnih hi October 16 tlai dar 4:30 hian Kalyani Stadium-ah a inkhel dawn.

Nimin inkhelah hian Bhawanipore tan Philip Adjah bawk a che ṭha a, Neroca player hlui hian minute 8-na lekah a khung. Second half-ah pawh Bhawanipore bawkin goal an khung hmasa a, Pankaj Moula-a'n minute 50-naah goal hnihna a khung. 

Garhwal FC tan Afdal Varikkodan-a'n minute 76-naah khung ve bawk mah se result a danglam phah lo a, Bhawanipore FC 2-1 in a chak.

Bhawanipore tana goal khungtu Philip Adjah leh Pankaj Moula te hian match hmasa bera FC Bengaluru United an hneh ṭumin goal khat ve ve a khung tawh bawk.

Nimin match hnuhnung zawkah ARA FC leh Bengaluru United te 1-1 in an inhnehtawk. Kalyani Stadium-a inkhelah ARA FC tan Pratik Swami-a'n minute 35-naah a, Bengaluru United-in injury time minute 5-naah Asrar Rehbar hmangin siphurh an sut hram.