Ronaldo a positive, Covid-19 in football a tibuai

Portugal-in nizan khan Nations League-ah Sweden an hmachhawn a, captain Cristiano Ronaldo chu Covid-19 positive vangin a inlan lo. 

Kum 35 mi Ronaldo hi Pathianni zana Portugal leh France goal awm loa an inhnehtawk ṭumin a khel tluan. Portuguese Football Federation (FPF) chuan, "Cristiano Ronaldo-a'n Covid-19 a vei. Amah hian harsatna a nei lo a, a inkhung hrang a, natna a lang lo," tiin ngaihtuahawm a nih loh thu an sawi.

Portugal captain Ronaldo hian France nena an inkhelh hma leh inkhelh zawhah a khelhpuite a selfie pui a, social media lamah pawh a pholang. Fernando Santos leh a hote an vannei a, Ronaldo chiah a positive a, player dang zawng an negative.

Portugal team-ah hian Premier League-a player langsar an tam a, Ronaldo positive hian thawm pawh a neih len phah hle. Manchester City midfielder Bernardo Silva leh defender Ruben Dias leh Joao Cancelo, Liverpoool forward Diogo Jota, Manchester United midfielder Bruno Fernandes, Wolves player Nelson Semedo, Rui Patricio, Joao Moutinho, Ruben Neves leh Daniel Podence te an him vek a, an manager tan chuan thawk huaina tham a tling.

Cristiano Ronaldo ringawt pawh hi Juventus tan chuan channa nasa tak a ni ngei ang. Italian club hian Inrinni zan hian Crotone an hmachhawn dawn a, October 20, Thawhlehni zanah Champions League match hmasa berah Dynamo Kiev nen an inkhel dawn.

Portugal captain hi ni 10 chhung a inkhung hran a ngaih nghal dawn avangin match pahnih hi chu a khel dawn lo. Juventus hian October 25-ah Verona an hmachhawn dawn a, hei aia pawimawh chu October 28-a Barcelona nena an inkhel tur a ni.

Khawvelin an hmuh châk chu Ronaldo leh Lionel Messi inhmachhawn a ni a, hei pawh a chiang ta lo. Covid-19 hian football history a thlak danglam hret hret dawn niin a lang a, Ronaldo tan nizana Sweden a hmachhawn thei lo hi a pawi lehzual. Portuguese forward hian ram tan goal 101 a khung tawh a, record siam turin goal kua a mamawh a, kum 35 mi a nih tawh avangin a hmabak a harsat phah sawt ang.

Covid-19 vanga tuar nasa ber pawl Italy-in tun hnaiah an harsatna an tawk chho leh ta a, Ronaldo positive hmain Serie A kal zel dan tur hi a buai tawh. International break lai hian Portugal captain chiah player langsar positive a ni lo a, Inter Milan defender Milan Skriniar pawh a positive.

Tun Inrinni zan dar 9:30 hian Milan Derby khelh a ni dawn a, Inter Milan leh AC Milan inkhel tur hian sawi zui a hlawh hle. Inter player Skriniar, Roberto Gagliardini, Radja Nainggolan, Ionut Radu leh Alessandro Bastoni te ram tana an fehchhuahnaah an positive.

Milan lamah Zlatan Ibrahimovic-a'n Covid-19 ngam tawhin negative tawh mah se Matteo Gabbia leh Leo Duarte te an positive. Italy-a football thuneitu sang FIGC dan erawhina sawi chiang, player 13 an dam a, hetah hian goalkeeper pakhat a tel bawk chuan inkhelh tlangpui tur a ni.

Covid-19 in inkhel entu leh sum lakluh chauh a nghawng tawh lo a, result pawh a nghawng. Player pawimawh ṭhenkhatin an khelh theih miau loh avangin club ṭhenkhat an vanduai a, club ṭhenkhat tan vannei a nih thei bawk.

Premier League champion lai Liverpool-in an match hnuhnung berah Aston Villa lakah an mualpho a, 7-2 in an chak lo. Covid-19 vangin Sadio Mane leh Thiago Alacantara te an chhawr thei lo a, a bik takin Senegalese forward thlaktu ṭha an neih loh an tuar a tih theih.

Manchester City pawh Leicester City lakah 5-2 in an mualpho a, Leeds United nen 1-1 in an inhnehtawk. Player inhliam dah ṭhat pawhin Covid-19 positive pathum Riyad Mahrez, Aymeric Laporte leh Ilkay Gundogan te tel lo hian nghawng lian tak a neiah a ngaih theih bawk.

Manchester United-in Europa League an khelh rei a, an ṭhenawm club Man City-in UCL an khelh rei vangin season bul ṭan tlai mah se Covid-19 vanga season a rei avangin player-ten hahchawlhna hun an nei lo a, season thar atana inpuahchahna ṭha an nei lo bawk. Paul Pogba positive leh Aaron Wan-Bissaka ni 14 chhung quarantine ngaite chu an harsatna belhchhahtu a ni.

Tunkar tawpah Premier League khelh chhunzawm a ni ang a, thuneitute lamin dan khauh tak siamin ruahmanna fel tak nei mah se player langsar thlengin positive an awm zel. Covid-19 hi a la reh mai dawna a lan loh avangin inkhel result-ah nghawng a nei zel ang.