Ronaldo hoin Portugal an tlawm! Mumang ramah Georgia an cheng thung

Portugal player ṭha rual an inlan lo a, captain Cristiano Ronaldo chuan khelmualah player langsar lo zawkte a ho khawm a, team tenau Georgia lakah rinkai zawk ni tho mah se 2-0 in an chak lo.

Roberto Martinez enkawl Portugal hi Group F hmahruaitu an ni tlang ta tho a, last 16-ah chuan Slovenia an hmachhawn ang, final an kalkawnga hmachhawn theih zingah Spain, Germany leh France te an awm thei dawn a, kalkawng a hautak dawn.

Georgia pawhin match vawi aṭanga point li hmuin pathumna ni mah se knockout stage an lut ve tho, last 16-a an tum tur chu Spain an ni a, thil mak beisei nawn a harsa mai thei a ni.

Group F inkhel dangah Turkey chuan Hakan Calhanoglu (51') leh Cenk Tosun (90+4') te goal hmangin Czech Republic 2-1 in an hneh a, last 16 an luh laiin chak lo Czech erawh an group aṭanga knockout stage lut lo awmchhun an ni thung.

Barakhaih

Georgia khan an chak chuan last 16 an lut thei tih an hria, a tir aṭangin thapui an thawh nghal. Portugal tlarhnung a phui lo a, mual laia ball changtu Georges Mikautadze chuan a sira mi Khvicha Kvaratskhelia pein ani hian a tlan tlangpui.

Ronaldo-a academy dina inzir tawh Kvaratskhelia hian chiang zet maiin a sir lam aṭangin a khung a, a bul an ṭan fuh takzet. Portugal lamin Ronaldo-a freekick hmangin chhanglet teuh viau mah se keeper Giorgi Mamardashvili chuan a lo dansak.

Second half-ah Georgia bawkin goal an neih belh - box chhungah Antonio Silva chuan Luka Lochoshvili a titlu a, a tirah referee Sandro Scharer-a'n hamrik ham lo mah se VAR hman a nih hnuah penalty pek an ni.

Penalty pettu Mikautadze tan harsatna tur a awm lo a, an goal hnihna an khung laia Georgia lam boruak chu sang vet vet tak a ni, khelmual chhung leh a sira mite chu an awm hle hle thei lo, lawm avangin an sapatal a ni ber mai awm e!

Georgia leh thil mak!

Tun dinhmunah Georgia hi world number 74 an ni a, an hneh tak Portugal hi parukna an ni mek thung - European Championship huangah FIFA ranking aṭanga chhutin, ram inhneh zinga ranking inthlau ber an ni hial.

Greece chuan Euro 2004 khan a vawi khat nan major tournament-ah hnehna an chang a, hemi ṭuma an hneh chu Portugal an ni a, a vawi khat nana an chak bakah khawvel barakhaihin an champion zui bawk.

Georgia chuan a vawi khat nana major tournament-a hnehna chang turin Portugal bawk an hneh, thawnthu mak leh danglam hi ziah nawn a ni ang em, tih chu hunin a la hril dawn - thil mak erawh a thlen a ngai ang.

Coach Willy Sagnol kaihhruai Georgia hian hun pawimawhah goal an khung leh keuh ṭhin, an si ban nghaktu Giorgi Mamardashvili chu Czech Republic an hneh ṭum ang bawkin a rintlak a, boruak nuam tak hnuaia last 16 an khel tur hi hmu an châkawm.

Mumang thleng dik

Goal hmahruai khung leh Player of the Match ni zui ta Khvicha Kvaratskhelia chuan, "Mimal thawhrah a ni lo a, mimala khel ṭha bik pawh kan awm lo, kan zavaia thawhrah a zarah Georgian mite chuan football-a kan hun ropui kan tawng.

"Mite chuan kan chak theih an ring lo a, last 16 kan luh pawh an ring lo - mahse min thlawptute zarah kan ti thei a ni. Kan chak theihna chance kha 1% chauh niin a lang, chu chu kan tihlawhtling," a ti.

Georgia coach Willy Sagnol chuan a naute hnenah zalenna a pek thu sawiin, "Inkhel ṭan dawn khan an hnenah eng thu ropui mah saw tur ka hre hran lo, rawlthar enghelh nei lo leh zalen taka an inkhel anga khel tawp turin ka hrilh.

"Nuam ti taka Euro khel turin ka chah a, mahni tih tur chin ṭha taka hlen chhuak tur leh ball chan loh lai pawha inthlahdah miah lo turin ka fuih bawk a, beisei phak bakin an khel chhuak ta a ni," a ti.

Portugal lam thu

An chak lo a, player inkhek chunga chak lo an nih avangin Georgia hneh loh kha Portugal nihna tak a ni kher lo. Chutihrualin, inelna neih laia tlawm erawh thil fuh ber a ni lo thung - Martinez leh a naute tan inenfiahna tur a ni ang.

Portugal coach Martinez chuan, "A bul kan ṭan ṭha tawk lo a, chutih laiin Georgia khan an mamawh ang takin goal an rawn nei hma thung. A bik takin keimahni lam goal bul hnaiah ball kan inpe fimkhur tawk lo deuh.

"Goal khung tumin kan bei let nasa em em a, amaherawhchu an tlarhnung a khawng bakah goalkeeper Giorgi Mamardashvili a che ṭha hle bawk, tun ṭum atan chuan chak phu zawk an chak," tiin Georgia a lawmpui thu a sawi.

Defender Danilo chuan an chak lohna aṭangin thil tam tak an zir chhuah phah tur thu a sawi a, last 16-a an khingpui tur Slovenia lakah pawh fimkhur taka an inlan a ngai dawn tih a sawi tel bawk a ni.