Chak zo lo Belgium an tlang

Group E match hnuhnung berah Belgium-in goal an khung lo a, Ukraine nen 0-0 in an inhnehtawk. Mahse, Belgium hian round of 16 an lut ta tho a, Belgium point hmuh ang zat, point li hmuin Ukraine erawh an tlang ve ta chuang lo!

Group E inkhel dangah Romania leh Slovakia te chu 1-1 in an inhnehtawk a, team pahnih hian Belgium leh Ukraine ang thoin point li an hmu - point li hmu zinga goal difference nei chhe ber Ukraine an tla a, an vanduai takzet.

Euro-ah hian table-a a sang pahnih ṭheuhin round of 16 an lut chiang a, pathumna zinga a ti ṭha pali an lut ve leh bawk - Netherlands, Georgia, Slovakia leh Slovenia te pathumna ti ṭha 'quota' in an tlang a, Slovenia phei chuan point thum an hmu!

Ukraine-in point li hmu chungin last 16 an thleng zo lo a, Romania nen an inkhelh hmasak bera goal an lo chhuah hnem hret chu pawi an ti vawng vawng ang - Hungary pawhin point thum nei mah se, goal difference-a Slovenia phak loin an tla ve bawk.

Inkhel hmuhnawm lo!

Stuttgart khawpuia inkhelah team pahnihin chak a ṭul tih an hria a, mahse, inkhel hmuhnawm tia sawi tur min chhawpsak thei lo - Ukraine tlarhnung an dingkhawng viau a, mahse, tlarhma lamah an hriam tawk lo thung a, a tawpah an tuar.

Belgium tan ṭum dang ang thoin captain Kevin de Bruyne a langsar a, Manchester City thiampuipa hian uiawm takin free-kick a thlawh goal thei lo thung - Romelu Lukaku pawh dan ngaitein a 'ṭhelhtupa' a la ni zel a, a chance neih ṭha zet chu goalkeeper Anatoliy Trubin-a zawnah tak uiawm takin a pet.

Belgium tan substitute Yannick Carrasco pawhin chance nei mah se, Trubin tan hlauhawm a siam lo. Ukraine tan La Liga top scorer Artem Dovbyk hlauhawm ṭhin mah se, khel ṭha em em mai, Belgium defender Wout Faes chuan a chance neih vawi hnih ngawt chu a lo dansak.

Mykhailo Mudryk chu hliam vangin a inlan thei lo a, Chelsea forward awm loh hlana bul ṭantu Roman Yaremchuk-a'n hun harsaah a theihna a pholang thei lo a, a tawpah chak zawk awm loa inṭhenin, Ukraine chu point hmuh inangah vanduai zawk an ni.

Hmabak hautak

Champion tura beisei ni chungin Belgium-in Germany an pan a, mahse, match thum an khelhah vawi khat chiah chakin, vawi khat an tlawm a, vawi khat draw an nei - last 16-ah anmahni ang thoa beisei phak lo France an hmachhawn dawn a, en a châkawm ta hle.

Belgium boss Domenico Tedesco chuan, "Hnehna chang turin kan kal ang. Team ṭha tak kan hmachhawn dawn a, mahse, team ṭha hmachhawn turin alawm last 16 kan luh - chutiang huphurh ni ila, he inelna hi khelh ve loh mai a hahdam zawk ang.

"Eng team pawh hmachhawn dawn ila, kan hlau lo. Kan inpeih tawh a, kan inpeih takzet e," a ti a, group stage-ah beisei phak lo mah se, zam hmel a pu lo. Hetihlai hian Ukraine erawhin point li nei chungin Euro an thlah a ṭul.

Ukraine manager Serhiy Rebrov chuan, "Kan mipuite rilru puthmang he hmunah hian kan rawn pholang - Europe thlawpna kan mamawh a, Europe-a awm kan ni tih kan pholan a ṭul bawk. He inelna kan hmachhawn hi kan tan a hlu a ni," a ti a, tla mah se ram buai kara an thlen chinah a lawm.

Fans an lawm lo

Ukraine lakah goal an khung lo a, last 16 lut tho mah se Belgium ṭantute an lawm lo - inkhelh zawhah nasa takin an player-te an au el a, captain Kevin de Bruyne chuan player-te chu khelmuala cham bang loin dressing room lam a pantir zui.

KDB hi player of the match-ah thlan zui niin, City midfielder hi lawmman a dawn lai pawhin fan-ten an au el nasa hle - inkhelh hma lawka a hming lama an zai nen chuan a thluk a dang ta daih! KDB hian hun tawp dawna an corner hmuh chu, goal khung tuma pet loin, 'short pass' hmangin an inpe a, hei hi fan-ten chak tum loah an puh.

Belgium captain chuan, "Minute khat chiah khatihlai khan a awm tawh a, risk lakna chi a ni tawh lo. Fan-ten chak an duh tih ka hrethiam. Mahse, risk lak hun a ni tawh lo a, kan corner aṭangin counter-attack awm se, goal khung palh se, ka chhe vek a ni mai. Risk lak a ngaih chang a awm a, fim taka ngaihtuah a ṭul chang a awm," a ti.

KDB chuan sawi zawmin, "Kan fan-te hi kan tan an hlu em em a, kan mamawh reng a ni. Kan match khelh pathuma kan mamawh ang khan France nena kan inhmachhawn hunah pawh kan mamawh ang," tiin a sawi.