South Africa-in final an lut ve ta

T20 Cricket World Cup semifinal-ah South Africa-in nimin zing khan Afghanistan an sawp a, an ram history-a a vawi khat nan final an lut. Proteas hian final-ah nizana India leh England inkhela chak zawk an hmachhawn ang. Nomawi inchuhna hi June 29, Inrinni zan dar 8:00-a neih tur a ni.

Proteas hian tun ṭum semifinal hma hian ODI leh T20 World Cup semifinal lut mah se an hlawhchham vek a, tun ṭuma hnehna an chan hi a hlu bik. South Africa hian an khingpui Afghanistan chu over 11.5 lekah 56 runs chauh siamtirin an vawm hlum vek a, over 8.5-ah 60/1 runs siamin wicket kuain hnehna an chang

Bul ṭan fuh lo

Brian Lara Cricket Academy-ah Afghanistan-in bat hmasak an thlang a, tun inelnaa run siam tam ber Rahmanullah Gubaz hoin inlan mah se bul an ṭan fuh lo. Gubaz hian run khat pawh siam loin pavillion-ah a kir a, Afghan batter zinga 10 runs siam tling chu Azmatullah Omarzai chauh a ni.

Proteas bowler-te an che ṭha thlawt a; Marco Jansen-a'n wicket thum lain 16 runs chauh a pe. Tabraiz Shamsi phei chuan 6 runs chauh pein wicket thum tho a la. Kagiso Rabadan(14/2) leh Anrich Nortje (7/2) ten wicket hnih ve ve an la bawk.

Super 8-ah Afghanistan hian semifinal lut turin Australia meuh hneh mah se South Africa lakah an zawr a, a chhan bulpui ber chu bul an ṭan fuh loh vang a ni. Inkhelh banah captain Rashid Khan chuan an chak loh chhanah batter-te run siam tlem vang a nih thu a sawi.

A harsa lo

South Africa bowler-ten hna harsa zawng zawng an thawk zo tawh a, batter tan chuan hna harsa a awm tawh lo. Chutihrualin opener Quinton de Kock-a'n run nga lek a siam a, Reeza Hendricks (29*) leh captain Aiden Markram (23*) ten a tawp an thleng a, over 8.5 lekah 60 runs siamin hnehna an chang.

Proteas captain Markram chuan, "Final luh chu a nuam takzet. Captain hnathawh chauh a ni lo a, team pumpui hnathawh a ni," tiin a sawi a, ṭhumvawrah an vannei tel thu a sawi bawk. Markram chuan, "Ṭhumvawrah chak ilang chuan vawm hmasak ka thlang ve tho ang. Ṭhumvawra a vanduai zawka ka ṭang kha, kan vanneihpui ta zawk," tiin a sawi.

Player of the match-a thlan Marco Jansen chuan, "Kan thil tum angte ṭha takin kan ti thei a, a lawmawm takzet a ni. Player tumah an phawk lek lo a, kan tumah kan chiang. Markram hi captain ṭha tak a ni a, a inringtawk em em a ni," tiin captain a fak.

Ngaihnawm

South Africa hi semifinal-ah an vanduai ṭhin hle. 1992 World Cup-ah ruahsur vangin an chak lo a, kum 199 semifinal-ah Australia nen an inhnehtawk a, a vanduai zawkah an ṭang. Kum 2015 semifinal-ah New Zealand lakah over tawp berah an chak lo a, tun ṭumah erawh an hun a inher chhuak ve ta.

Proteas hian hneh loh nei loin final an thleng a, champion turin beiseina sang tak an nei ang. Chutihrualin semifinal khelhna pitch erawhin sawisel a hlawh viau thung. Afghanistan captain Rashid Khan-a'n thutlukna a siam sual a, vuak hmasak thlang se chuan result hial a danglam thei ang.