Chelsea-in Barca rawlthar Guiu la lut dawn

Premier League club Chelsea-in team din thar tumin player naupang lam an melh zel a, Barcelona rawlthar ṭhangduang Marc Guiu an la lut hnai - London khawpuiah medical a nei dawn a, he thuziak i chhiar meuh chuan an inrem fel tawh hial mai thei.

Kum 18 mi striker hi Blues hian man tlawmtêin an lei thei dawn a, hei hi a contract-ah pound maktaduai nga leka leichhuah theihna dan a awm tel vang a ni. Barca hian an player hi heti taka tlawma hralh hi an phal leh lo a, contract thar zawrh mah se, an inrem thei ta lo.

Chelsea hian Spain Under-19 international hi kum ruk chhung atan contract an ziahpui dawn a, Barcelona academy La Masia aṭanga inzir chhuak niin, a lakah beiseina a sang hle.

Guiu hi tharum a ngah bakah player che rang a ni a, a kum a la nau deuh avangin tawnhriat erawh a la nei tlem rih hle. Barcelona tan match sarih khel ve tawhin goal hnih a khung a, kum 2023 khan Athletic Bilbao lakah Barca tana a match hmasa ber khelin second 23 lek khelmualah hun a hmang hman tihin goal a khung nghal.

Chelsea hian Aston Villa attacking midfielder Omari Kellyman chu la lut turin inremna an lo neihpui tawh bawk a, kum 18 mi hi £19mtd-in an lei ang - kum nga chhung atan contract a ziak dawn a, kum khat dang pawhsei theih a ni ang.

Spain Under-17 leh U19 tan pawha lo inlan tawh Guiu leh Kellyman hma hian Tosin Adarabioyo chu Blues hian an lo la lut tawh bawk a, kum 26 mi centre back hian free transfer-a zawmin, kum li chhung atan contract a ziak.