Euro 2024 : Engkim a chiang ta vek e

Euro 2024 group stage chu June 26, Nilaini zan khan khelh zawh a ni a, last 16 lut tur bakah an intum dan tur thlengin a chiang ta vek. Group paruk aṭangna pakhatnate chu Germany, Spain, England, Austria, Romania leh Portugal te an ni. Switzerland, Italy, Denmark, France, Belgium leh Turkey te chu pahnihna ni chungin an tling ve bawk.

Group tina pathumna aṭangin, a ti ṭha pali an tling. Chungte chu Netherlands, Georgia, Slovakia leh Slovenia te an ni a; Hungary leh Croatia te erawh pathumna ni chung siin last 16 an tel pha lo. Knockout round hi June 29, Inrinni zan aṭangin khelh ṭan a ni ang.

Point li hmu pali

Group E team pali Romania, Belgium, Slovakia leh Ukraine ten point li vek an hmu a, thil danglam tak a ni. Group C-a point thum hmu Slovenia ten last 16 an luh laiin point li hmu Ukraine an tla thung. Hei hi a chhan chu group khat aṭangin a sang pahnih an lut nghal a, palina an tla - pathumna bik chu group tina pathumna paruk zinga ti ṭha palia an tel chuan, last 16 an lut thung.

Goal difference hmangin group E dinhmun chinfel a ni a, Romania leh Belgium te chu pakhatna leh pahnihna niin an tling. Pathumnaa awm Slovakia pawhin last 16 an lut a, Ukraine erawh table mawngphaha an awm avangin an tla.

Fixtures rem dan

Group paruka pathumna ram paruk zingah Netherlands (group D), Georgia (group F), Slovakia (group E) leh Slovenia (group C) ten last 16 an lut a; fixtures awm dan tur a chiang nghal. Netherlands leh Georgia te hi an point hmuh zat bakah goal difference leh goal khung zat te a inang vek. Oranje hi disciplinary point-ah an ṭhat zawk avangin dah sang zawk an ni.

Chutihrualin pakhatna leh pahnihna nih hian hian khingpui turah danglamna a thlen hran lo. Chutihrualin group pali tlingte erawhin nghawng a nei. Tun ṭumah hian pathumna tlingte hi group C, D, E leh F te an ni a; tlingte hi group A, C, D leh E ni se chuan an tumpui a danglam leh thung ang.

Group C, D, E leh F an tling takah chuan Group B winner Spain-in group F pathumna Georgia an tum phah ta a, group F pakhatna Portugal-in group C pathumna Slovenia, group E pakhatna Romania-in group D pathumna Netherlands, group C pakhatna Spain-in group E pathumna Slovakia an hmachhawn dawn a ni.