Greenwood leh Marseille an inhnaih

Manchester United forward Mason Greenwood chu French club Marseille nen an indawr mek a, Ligue 1 club nena an inbiakna hi a kaltluang viau niin khawthlang media-te chuan an tarlang.

Kum 22 mi forward hi a bialnu nena an buaina avang khan Old Trafford-ah a tlatlum lo a, season hmasa kha La Liga club Getafe-ah loan-in a khel. Spanish club tan hian match 36 khela goal 10 khungin assist vawi ruk a nei a, a che chhe lo.

Getafe hian Greenwood hi loan-a hawh leh duh mah se, United hian a ngheta hralh an duh nia sawi a ni a, mahse, tun hnai khan a man atana an chhiar pound maktaduai 40 chu a tam deuh avangin a chhuak dawn lo nia sawi a awm leh - tunah Marseille nen an indawr leh ta.

English club hian £30mtd-a Lazio dawrna chu an lo hnar tawh a, England tana vawi khat inlan tawh player hi Juventus, Valencia, Borussia Dortmund leh Atletico Madrid te pawhin an duh nia sawi a ni.

Red Devils-in Lazio an hnarna zat enin, Marseille hian hei aia tam hian an ngam ang em, tih chu zawhna lo awm a ni. French club hi Brighton & Hove Albion boss hlui Roberto de Zerbi chuan a enkawl dawn a, Greenwood hian De Zerbi hnuaia khelh hi a hnial lo niin a lang.