Foden-a'n England squad a chhuahsan

Euro 2024 khel mek England midfielder Phil Foden chuan a fa pathumna tur a pian dawn avangin squad a chhuahsan a, Pathianni hian Three Lions squad hi a zawm leh zui ang.

Football Association chuan Nilaini zan khan thuchhuah siamin, Foden chuan chhungkaw thil avanga England squad a chhuahsan lailawk thu an puang a, a hnu lawkah a nupuiin an fa pathumna tur a hrin dawn vang a nih thu media lamah puanzar a ni.

Kum 24 mi Foden hian a kawppui Rebecca Cooke nen fa pathum an nei tawh a, an fapa upa zawk Ronnie chu kum nga mi niin, kum hnih mi fanu True an nei bawk. April khan a kawppui Cooke nen hian an fa pathumna tur an beisei mek thu an lo puang tawh.

Premier League Player of the Season ni lai Foden hian ram tan match 37 khel tawhin, goal li a khung bakah assist vawi riat a nei a, tun Euro-ah erawh match thuma bul a ṭan vek chungin beisei a phak rih lo.

Gareth Southgate-a enkawl England hian match thum aṭanga point nga hmuin last 16 an lut a, Pathianni zan dar 9:30-ah Slovakia an hmachhawn dawn - Foden hian Pathianniah squad a zawm leh dawn chauh avangin a inlan lo a nih pawhin a mak lo ang.

Three Lions an vannei a, final khelh hma chuan team ṭha Germany, Spain, France, Portugal-te an tum thei dawn lo a, heti chunga an zinkawng a tawp hma a nih chuan dem an hlawh khawp ang.