Free agent ṭha an tam khawiah nge an kal dawn?

European top five league-ah transfer a tawp tawh a, chutihrual chuan club nei lo player erawh lakluh theih an la ni reng thung. 

Premier League club-te chu Champ-ionship hnuai lam club player-te lalut thei turin nizan dar 9:30 thleng kha hun hawnsak an la ni a, he thuziak i chhiar meuh chuan EFL club aṭanga player lalut Premier League club an awm nualin a rinawm.

Hetiang boruak karah hian club khelhna nei loa awm mek player an la awm nual bawk a, kum dang zawng aiin free agent player la awmte hi an hming a langsarin an ṭha zawk em ni chu aw, tih tur a ni. 

Croatian striker Mario Mandzukic, English midfielder Jack Wilshere leh striker Daniel Sturridge-te hi khelhna club nei loa awm mai mai atan chuan uiawm tak an ni. 

Arsenal player beiseiawm tak ni ṭhin Wilshere hian kum 2018 khan beiseina sang tak nen West Ham a zawm a, mahse hliam vanga a nih tur ang ni phak lo player hi Hammers-ah pawh a hliamin a kiansan lo. 

Kum hnih chhunga match 19 chiah a inlan hnuah thla kua cham turin hun la nei mah se inhriatthiam tawnnain West Ham nen an inṭhen a, Arsenal tana match 197 khel hman midfielder hi kum 28 chauh a la nih avangin player iaiawm erawh a la ni lo. 

England tan vawi 34 a inlan ve hman a, ram tana a inlan hnuhnun ber erawh kum 2016 daih tawh khan a ni - Euro last 16-ah Iceland chu 2-1 in an ngam lo a, hemi hnuah hian England jersey a ha leh ta lo. 

Arsenal tana FA Cup nomawi vawi hnih chawi a, 2010-11 season a PFA Young Player of the Year ni thei Wilshere hian, "Ka in fit ṭha a, inkhel turin ka inpeih a ni," tiin a sawi a, hliamin a tlakbuak nawn a nih ngawt loh chuan free transfer a Wilshere lakluh chu pheichham man ang hial a ni ang. 

Manchester United tana Premier League nomawi lo chawi tawh striker hi Watford chuan a duh lam club pan turin an chhuah zalen a, United a chhuahsan hnua Arsenal tana season nga ngawt khel zui striker hi kum 29 chauh a la nih bawk avangin a thlawna lakluh atan chuan duhthusam a ni. 

England tana vawi 42 inlan thei hi Premier League club Brighton & Hove Albion chuan lakluh tumin an hel mek nia sawi a ni a, English top flight club vantlang tan chuan ṭhatpui tham khawp 'talent' a la nei. 

Arsenal player hlui zinga mi Samir Nasri pawh club nei loin a awm mek - kum 33 mi midfielder hian Gunners tan 2008-2012 kha a khel a, match 220 inlansakin Manchester City chu pound maktaduai 25 ngawtin a pan. 

Etihad Stadium-ah kum 2017 thleng a cham a,  Turkish club Antalyaspor a zawm. Kum 2018 khan UEFA chuan a drip khai avangin thla 18 atan an hrem a, hremna hi 'backdate' a nih avangin kum 2018 tawp lamah West Ham a zawm - season khat hnuah Hammers-in an chhuah zalen a, season hmasa khan Belgian club Anderlecht tan match riat chiah a khel. 

English striker uiawm sawi apianga tlarhma luah hmasa pawl chu Daniel Sturridge a ni. Liverpool striker hlui hian goal khung lamah harsatna nei lo mah se hliam vangin a nih tur ang a ni phak lo a, a ropui tur angin a ropui tawk lo. 

March thla khan sum inchawina lama a lo inhnamhnawih avangin a khelhna Trabzonspor chuan an chhuahtir a, season hmasa khan Turkish club tan hian match 16 khel hmanin goal sarih a khung. 

Kum 31 mi striker hian MLS club Inter Miami nen sawizawm mek a ni a, a 'fit' ṭhat phawt chuan European football-ah pawh striker langsar pawl ni phak turin theihna a la nei. 

Manchester City leh Chelsea tan pawha lo khel tawh striker hian a career a a hun tawn ropui bera chhal theih chu 2013-14 season khan Reds-ah a hmang a, match 33-ah goal 24 a khung - Champions League (Liverpool) leh Premier League (Chelsea)-ah a champion tawh bawk. 

AC Milan tana a khelh lai en pha tan chuan Brazilian striker Alexandre Pato thiamzia theihnghilh theih a ni lo. Mahse, hliam vangin Milan-ah beisei a phak lo zui a, ngai a awh leh tawh lo. 

Kum 31 mi striker hian August thla khan Brazilian club ṭha Sao Paulo a a contract neihlai chu a titawp a, match 35 a inlansakah goal kua a khung - Brazil lama a kir hma hian Chinese Super League club Tianjin Quanjian tan a khel a, match 60-ah goal 36 ngawt a khung. 

Brazil tan vawi 27 inlana goal sawm khung thei striker hi Serie A club Genoa leh Spezia Calcio-ten lakluh tumin an hel mek a, Serie B club Monza-in an duh bawk.

Monza neitupa hi AC Milan neitu ni ṭhin Silvio Berlusconi a ni a, Milan tan a khelh laia match 150 a goal 63 khung thei striker hi Serie B lamah kan hmu thut a nih pawhin a mak lo ang. 

Kum 34 mi Mario Mandzukic hian a career tawp lam a hmang ve tawh niin a lang a, season hmasa khan Juventus aṭangin Qatari club Al-Duhail a zawm a, mahse match 10-ah goal hnih chauh a khung hnuin chhuah zalen a ni. 

Juve tana Serie A nomawi pali a chawi a, Bayern Munich a season hnih hun a hman chhungin Bundesliga nomawi pahnih leh Champions League nomawi a chawi bawk - Lokomotiv Moscow, West Ham leh Sheffield United-te hming lam rik a ni. 

Mandzukic ang thoa 'Super Mario' tia hming lem an pek Mario Balotelli pawhin club khelhna a nei lo mek a, season hman zawh takah khan Serie A club Brescia tan khelin Serie B lama an tlak hnuah an chhuah zalen. 

Mario hian tun hnaiah a club khelhna tur a chian thuai tur thu a sawi a, Brazilian club Vasco da Gama bakah MLS club sawiruk an ni a, Serie A club Genoa hming a ri bawk - amah hian Italy a cham a duh ber nia sawi a ni.