West Ham-in Foderingham an la lut

Euro khelh laiin transfer bazar-ah West Ham-in thawm an nei zel - tun nipui transfer-a an player lakluh pahnihna ni turin Sheffield United goalkeeper Wes Foderingham chu free transfer-in an la lut a, kum hnih chhung atan contract a ziak.

Kum 33 mi keeper hian July 1-ah Sheffield-a a contract a hmang zo dawn a, a contract zawh hunah London club hi a zawm ang. Season hman zawh takah khan Sheffield tan match 30 a khel a, mahse, Championship lamah an tla a ni.

Rangers, Swindon, Crystal Palace leh Fulham tan pawha lo khel tawh keeper hian Sheffield-ah season li zet a khel a, tunah chuan Hammers tan a khel ve dawn ta. Mahse, Hammers hian France international Alphonse Areola leh tawnhriat nei ṭha Łukasz Fabiański an nei a, Foderingham hi thachhang dawltu tur niin a lang.

England tana age level lama lo inlan tawh Foderingham chuan, "Fans nei ṭha tak tak club tan ka lo khel tawh ṭhin a, ka vannei hle. West Ham pawh hi chutianga fans nei ṭha chu an ni a, he team hi hmasawn lam an pan zel avangin a hunah tak ka zawm niin ka ngai.

"Club tan hun duhawm a inher mek a, Hammer ka ni ve thei ta hi ka lawm," a ti. West Ham hi an coach David Moyes nen season tawp rualin an inṭhen a, coach thar Julen Lopetegui hoin season thar an hmachhawn dawn.

Real Madrid boss hlui hian Brazilian winger Luis Guilherme chu a lo la lut tawh bawk a, kum 18 mi player ṭhangduang hi Palmeiras aṭangin pound maktaduai 25.5-in an lei - kum nga chhung atan contract an ziahpui a ni.